തലയോലപ്പറമ്പ്: ഭാര്യയേയും ഭാര്യാമാതാവിനെയും കൊലപ്പെടുത്തിയ യുവാവ് പോലിസിൽ കീഴടങ്ങി. ചൊവാഴ്ച രാത്രി 7.30 ഓടെ മറവൻതുരുത്ത് വാളോർമംഗലത്താണ് നാടിനെ നടുക്കിയ കൊലപാതകം നടന്നത്. 

5-ാം വാർഡിൽ മൂലേപ്പറമ്പിൽ

(ശിവപ്രസാദം വീട്ടിൽ) ഗീത (60), ശിവപ്രിയ (33) എന്നിവരെയാണ് മരുമകൻ വൈക്കം നേരേ കടവ് പുളിന്തറ വീട്ടിൽ നിധീഷ് (39) അതിദാരുണമായി വെട്ടിക്കൊലപ്പെടുത്തിയത്.ഗീതയുടെ മൃതദേഹം കിടപ്പ് മുറിയിലെ കട്ടിലിൽ കമിഴ്ന്ന് കിടക്കുന്ന നിലയിലും ശിവപ്രിയയുടെ മൃതദേഹം നിലത്ത് വെട്ടേറ്റ് ചോര വാർന്ന നിലയിലുമാണ് കണ്ടത്.കനത്ത മഴയായിരുന്നതിനാൽ സമീപവാസികൾ ആരുംതന്നെ സംഭവം അറിഞ്ഞിരുന്നില്ല. കൃത്യത്തിന് ശേഷം 4 വയസ്സുള്ള മകളെയും എടുത്ത് നേരെ കടവിലുള്ള ബന്ധുവീട്ടിൽ എത്തിയപ്പോഴാണ് ചോരയിൽ കുളിച്ചു നടന്നുപോയ നിധീഷിനെ കണ്ട് ബന്ധുവിവരം തിരക്കിയത്. സംഭവം മനസ്സിലാക്കിയ ബന്ധുവാണ് വിവരം തലയോലപ്പറമ്പ് പോലീസിൽ അറിയിച്ചത്. തുടർന്ന് പോലീസ് എത്തിയാണ് ഇയാളെ കസ്റ്റഡിയിൽ എടുത്തത്‌. കൊലപാതകവീട്ടിലേക്ക് പോലീസ് എത്തിയപ്പോഴാണ് നാട്ടുകാർ കൊലപാതക വിവരം അറിയുന്നത്. ഉദയനാപുരത്ത് പപ്പട കച്ചവടം നടത്തുകയായിരുന്നു നിധീഷ്. ഒന്നര വർഷം മുമ്പ് വിദേശത്ത് നിന്ന് അവധിക്കെത്തിയ ഗീതയുടെ മകൻ ശിവപ്രസാദ് വല്ലകത്ത് വച്ചുണ്ടായ ബൈക്ക് അപകടത്തിൽ മരണപ്പെട്ടതിനെ തുടർന്ന് ശിവപ്രിയ ഗീതയ്ക്കൊപ്പവും നേരെ കടവിലുമായി മാറി മാറിയായിരന്നു താമസം. അടുത്ത കാലത്ത് ശിവപ്രിയ വൈക്കത്ത് സ്വകാര്യ സ്ഥാപനത്തിൽ ജോലിക്ക് പോകുന്നുണ്ടായിരുന്നു. വൈകിയാണ് വീട്ടിൽ എത്തിയിരുന്നത്.ഇതിൽ സംശയം ഉണ്ടായിരുന്നതായാണ് സൂചന.4 വയസ്സുള്ള മകൾ മറവൻതുരുത്തിലെ അംഗനവാടിയിലാണ് പഠിക്കുന്നത്. തിങ്കളാഴ്ച വൈകിട്ട് നിധീഷ് വീട്ടിൽ എത്തിയ ശേഷം പിന്നീടാണ് ശിവപ്രിയ എത്തിയത്.ഇതിനിടെ ശക്തമായ മഴ പെയ്തിരുന്നു. വീട്ടിലെ ടി.വി യും ഉച്ചത്തിൽ വച്ചിരുന്നു. ഇതിനിടെ കൊലപാതകം നടത്തിയ ശേഷം കുട്ടിയെയും എടുത്ത് ഇയാൾ പോകുകയായിരുന്നു എന്നാണ് അറിയുന്നത്. തലയോലപ്പറമ്പ് പോലീസ് പ്രതിയെ കസ്റ്റഡിയിലെടുത്തുവെങ്കിലും നിതീഷിന്റെ കയ്യിൽ ഗുരുതരമായി മുറിവുപറ്റിയതിനാൽ വിദഗ്‌ധ ചികിത്സയ്ക്കായി കോട്ടയം മെഡിക്കൽ കോളേജിലേക്ക് കൊണ്ടുപോകുകയായിരുന്നു. ജില്ലാ പോലീസ് മേധാവി എ. ഷാഹുൽ ഹമീദ്, വൈക്കം ഡിവൈഎസ്പി സിബിച്ചൻ ജോസഫ്, തലയോലപ്പറമ്പ് എസ് എച്ച് ഒ വിപിൻ ചന്ദ്രൻ , എസ് ഐ പി. എസ്സ് സുധീരൻ ഉൾപ്പടെ പോലീസ് ഉദ്യോഗസ്ഥർ സ്ഥലത്തെത്തി പരിശോധന നടത്തി.. ഫോറൻസിക് വിദഗ്ധർ ഉൾപ്പടെ സ്ഥലത്തെത്തിയ ശേഷം ഇൻക്വസ്റ്റ് നടപടികൾ അടക്കമുള്ളവ നടക്കും.

. .