Devotees in search of Amrit; Varavate Prayagraj on Shivratri

ന്യൂ ഡൽഹി : ശിവരാത്രി മഹോത്സവത്തോടനുബന്ധിച്ച്‌ മഹാകുംഭമേളയില്‍ പങ്കെടുക്കാൻ ഭക്തലക്ഷങ്ങള്‍ പ്രയാഗ്‌രാജിലേക്ക്. ഇതുവരെയുള്ള കണക്കുകള്‍ പ്രകാരം 60 കോടി ഭക്തരാണ് ത്രിവേണീ സംഗമത്തില്‍ പുണ്യസ്നാനം ചെയ്തത്. ശിവരാത്രിയുടെ ഭാഗമായി ലക്ഷക്കണക്കിന് ആളുകളാണ് പ്രയാഗ്‌രാജിലേക്ക് എത്തുന്നത്.

തിരക്ക് വർദ്ധിക്കുന്ന സാഹചര്യത്തില്‍ പ്രയാഗ്‌രാജില്‍ ഗതാഗത നിയന്ത്രണം കടുപ്പിച്ചിട്ടുണ്ട്. ട്രെയിൻ, വിമാനം, റോഡ് മാർഗം എത്തുന്നവരുടെ എണ്ണം അനിയന്ത്രിതമായി ഉയരുകയാണ്. ശിവരാത്രി വരെ തിരക്ക് വർദ്ധന തുടരുമെന്നാണ് വിലയിരുത്തല്‍. തിരക്കേറിയ പ്രദേശങ്ങളില്‍ കൂടുതല്‍ സുരക്ഷാ ഉദ്യോഗസ്ഥരെ വിന്യസിക്കും.

ശിവരാത്രി ദിവസം അവസാന അമൃത് സ്നാനം ചെയ്യാനായി ഭക്തരുടെ വലിയ ഒഴുക്കാണ് പ്രയാഗ് രാജില്‍ അനുഭവപ്പെടുന്നത്. കഴിഞ്ഞ രണ്ട് ദിവസവും റെയില്‍വേ സ്റ്റേഷനുകളില്‍ തിരക്കുണ്ടായിരുന്നു. ഇന്നലെ 102 സ്പെഷ്യല്‍ ട്രെയിനുകളാണ് സർവീസ് നടത്തിയത്. ശനിയാഴ്ച 149 ട്രെയിനുകളും സർവീസ് നടത്തി.

കഴിഞ്ഞ ദിവസം മണിക്കൂറുകളോളം നീണ്ട ഗതാഗത കുരുക്കും അനുഭവപ്പെട്ടിരുന്നു. 42 ദിവസത്തിനുള്ളില്‍ 4.50 ലക്ഷത്തിലധികം പേരാണ് വിമാനമാർഗം കുംഭമേളയ്‌ക്കെത്തിയത്. അവസാനത്തെ അമൃത് സ്നാനത്തില്‍ പങ്കെടുക്കാൻ എത്തുന്ന എല്ലാ ഭക്തർക്കും ആവശ്യമായ ഒരുക്കങ്ങള്‍ പൂർത്തിയാക്കിയിട്ടുണ്ടെന്ന് സർക്കാർ അറിയിച്ചു.

Tags:

enlightmedia,malayalamnews,kerala,latestnews