ബുർജീൽ ആശുപത്രി ഒമാനിലെ ആദ്യ സമ്പൂർണ വേദനാ ചികിത്സാ സമ്മേളനം സംഘടിപ്പിച്ചു

മസ്‌കറ്റ്: വേദനാ ചികിത്സാ രംഗത്ത് പുതിയ ചുവടുവെപ്പുമായി ബുർജീൽ ആശുപത്രി മസ്‌കറ്റ് സംഘടിപ്പിച്ച ഒമാനിലെ ആദ്യ സമ്പൂർണ വേദനാ ചികിത്സാ സമ്മേളനം ശ്രദ്ധേയമായി. ഒക്ടോബർ 24ന് അൽ ഖുറം ക്രൗൺ പ്ലാസ ഹോട്ടലിൽ നടന്ന സമ്മേളനത്തിൽ 250ലധികം പേർ പങ്കെടുത്തു. ആരോഗ്യ മേഖലയിലെ പ്രമുഖർ, വിദഗ്ധ ഡോക്ടർമാർ, വിവിധ ആശുപത്രികളിലെ പ്രതിനിധികൾ എന്നിവരെ ഒരുമിപ്പിച്ച സമ്മേളനം രാജ്യത്ത് വേദനാ ചികിത്സയ്ക്കായി ദേശീയതലത്തിലുള്ള ഏകോപിത സംവിധാനമൊരുക്കുന്നതിനും പാലിയേറ്റീവ് കെയർ സേവനങ്ങളുടെ ലഭ്യത വിപുലീകരിക്കുന്നതിനുമുള്ള ചർച്ചകൾക്ക് വേദിയായി.

ഒമാനിൽ വേദനയെ കേന്ദ്രീകരിച്ച് പൂർണമായും സംഘടിപ്പിക്കുന്ന ആദ്യ സമ്മേളനമെന്ന പ്രത്യേകതയും പരിപാടിക്കുണ്ട്. വേദനയുടെ വിവിധ രൂപങ്ങൾ, അവയുടെ കാരണങ്ങൾ, ആധുനിക ചികിത്സാരീതികൾ, രോഗികളുടെ ജീവിതനിലവാരം മെച്ചപ്പെടുത്തുന്നതിനുള്ള സംയോജിത ചികിത്സാ സമീപനങ്ങൾ എന്നിവയ്ക്ക് സമ്മേളനം പ്രാധാന്യം നൽകി.

പ്രമുഖരുടെ സാന്നിധ്യത്തിൽ ഉദ്ഘാടനം

ഒമാൻ ആരോഗ്യ മന്ത്രാലയത്തിലെ സ്വകാര്യ ആരോഗ്യ സ്ഥാപനങ്ങളുടെ ഡയറക്ടർ ജനറൽ ഡോ. മുഹന്ന അൽ മുസൽഹി മുഖ്യാതിഥിയായി സമ്മേളനം ഉദ്ഘാടനം ചെയ്തു. ഡോ. സുൽത്താൻ ബിൻ സാലിം അൽ ഹാർത്തി വിശിഷ്ടാതിഥിയായി പങ്കെടുത്തു.

ബുർജീൽ ഹോസ്പിറ്റലിലെ എട്ട് വിദഗ്ധ ഡോക്ടർമാരും ഒമാനിലെ വിവിധ ആശുപത്രികളെ പ്രതിനിധീകരിച്ച ആരോഗ്യ വിദഗ്ധർ ഉൾപ്പെട്ട ദേശീയതല പാനൽ ചർച്ചയും സമ്മേളനത്തിന്റെ ഭാഗമായി നടന്നു. വേദനാ ചികിത്സാ രംഗത്തെ നിലവിലെ വെല്ലുവിളികൾ, വിവിധ ചികിത്സാ വിഭാഗങ്ങൾ തമ്മിലുള്ള സഹകരണം, രോഗികൾക്ക് ആവശ്യമായ പരിചരണം സമയബന്ധിതമായി ലഭ്യമാക്കൽ തുടങ്ങിയ വിഷയങ്ങൾ ചർച്ചകളിൽ പ്രധാനമായി.

വേദനാ ചികിത്സയ്ക്ക് സമഗ്ര സമീപനം

വേദന എന്നത് ഒരേയൊരു അവസ്ഥയല്ലെന്നും അതിന്റെ സ്വഭാവവും കാരണവും അനുസരിച്ച് വ്യത്യസ്ത ചികിത്സാ രീതികൾ ആവശ്യമായി വരുമെന്നും സമ്മേളനം ചൂണ്ടിക്കാട്ടി. പെട്ടെന്നുണ്ടാകുന്ന വേദനയും ദീർഘകാലമായി തുടരുന്ന വേദനയും ഒരേ രീതിയിൽ കൈകാര്യം ചെയ്യാനാകില്ല. രോഗിയുടെ ആരോഗ്യസ്ഥിതി വിലയിരുത്തി അനുയോജ്യമായ ചികിത്സ നിർണയിക്കുന്നതിന് വിവിധ വിഭാഗങ്ങളിലെ വിദഗ്ധരുടെ കൂട്ടായ പ്രവർത്തനം അനിവാര്യമാണ്.

വേദനയുടെ ശാരീരികവും മാനസികവുമായ പ്രത്യാഘാതങ്ങൾ പരിഗണിച്ചുകൊണ്ടുള്ള ചികിത്സാ സമീപനത്തിന് പ്രാധാന്യം നൽകണമെന്നും രോഗിയുടെ ദൈനംദിന ജീവിതത്തെയും ജീവിതനിലവാരത്തെയും ബാധിക്കുന്ന ദീർഘകാല വേദനയ്ക്ക് കൃത്യമായ വിലയിരുത്തലും തുടർപരിചരണവും ഉറപ്പാക്കണമെന്നും സമ്മേളനത്തിന്റെ ആശയം വ്യക്തമാക്കുന്നു.

ഗുരുതരമായ രോഗാവസ്ഥകളിലുള്ളവർക്ക് ആശ്വാസവും മെച്ചപ്പെട്ട ജീവിതനിലവാരവും ഉറപ്പാക്കാൻ ലക്ഷ്യമിടുന്ന പാലിയേറ്റീവ് കെയർ സേവനങ്ങളുടെ ലഭ്യത വർധിപ്പിക്കുന്നതും ചർച്ചയിലെ പ്രധാന വിഷയങ്ങളിലൊന്നായിരുന്നു.

ഊബുർജീൽ ഹോസ്പിറ്റലിൽ പെയിൻ ക്ലിനിക്കിന് തുടക്കം

സമ്മേളനത്തോടനുബന്ധിച്ച് ബുർജീൽ ഹോസ്പിറ്റൽ മസ്‌കറ്റ് പുതിയ പെയിൻ ക്ലിനിക്കിനും തുടക്കം കുറിച്ചു. പെട്ടെന്നുണ്ടാകുന്ന വേദനകൾക്കും ദീർഘകാലമായി തുടരുന്ന വേദനകൾക്കും വിദഗ്ധ വിലയിരുത്തലും ചികിത്സയും ലഭ്യമാക്കുകയാണ് ക്ലിനിക്കിന്റെ ലക്ഷ്യം.

വിവിധ ചികിത്സാ വിഭാഗങ്ങളുടെ സഹകരണത്തോടെയുള്ള ബഹുവിഷയ സമീപനമാണ് ക്ലിനിക്കിന്റെ പ്രത്യേകത. ഓരോ രോഗിയുടെയും അവസ്ഥ വിലയിരുത്തി അനുയോജ്യമായ ചികിത്സാ പദ്ധതി തയ്യാറാക്കുന്നതിനും വേദന നിയന്ത്രിക്കുന്നതിനും ആവശ്യമായ തുടർപരിചരണം നൽകുന്നതിനും ഈ സംവിധാനം സഹായകരമാകും.

വേദനയെ ഒരു ലക്ഷണമായി മാത്രം കാണാതെ അതിന്റെ അടിസ്ഥാന കാരണങ്ങളും രോഗിയുടെ മൊത്തത്തിലുള്ള ആരോഗ്യസ്ഥിതിയും പരിഗണിച്ചുള്ള ചികിത്സ ഉറപ്പാക്കുന്നതിന് ഇത്തരം പ്രത്യേക ക്ലിനിക്കുകൾക്ക് നിർണായക പങ്കുവഹിക്കാനാകും.

ഒമാനിലെ ആരോഗ്യരംഗത്ത് വിദഗ്ധരുടെ അറിവും അനുഭവവും പങ്കുവെക്കുന്നതിനും ചികിത്സാ സംവിധാനങ്ങൾ തമ്മിലുള്ള സഹകരണം ശക്തിപ്പെടുത്തുന്നതിനും വേദനാ ചികിത്സാ സമ്മേളനം സഹായകരമായി. ദേശീയതലത്തിലുള്ള ചികിത്സാ ഏകോപനവും കൂടുതൽ വിപുലമായ പാലിയേറ്റീവ് കെയർ സേവനങ്ങളും ലക്ഷ്യമിട്ടുള്ള ചർച്ചകൾക്ക് തുടക്കമിട്ട സമ്മേളനം, വേദന അനുഭവിക്കുന്ന രോഗികൾക്ക് മെച്ചപ്പെട്ട പരിചരണം ഉറപ്പാക്കാനുള്ള ശ്രമങ്ങളിൽ ശ്രദ്ധേയമായ ചുവടുവെപ്പായി.