Indian community in Qatar organized Republic Day celebrations.

ദോഹ: ലോകമെങ്ങുമുള്ള ഇന്ത്യക്കാർക്കൊപ്പം ഖത്തറിലെ ഇന്ത്യൻ പ്രവാസി സമൂഹവും ഇന്ത്യൻ റിപ്പബ്ലിക് ദിനത്തിന്‍റെ 75-ാം വാർഷികം വിപുലമായ പരിപാടികളോടെ ആഘോഷിച്ചു. രാവിലെ ഏഴു മണിക്ക് ഇന്ത്യൻ കൾച്ചറൽ സെന്‍ററിൽ നടന്ന ചടങ്ങിൽ ഇന്ത്യൻ അംബാസിഡർ വിപുൽ ത്രിവർണ പതാക ഉയർത്തി. ദേശീയഗാനാലാപനത്തെത്തുടർന്ന് അംബാസിഡർ ഇന്ത്യൻ പ്രസിഡന്‍റിന്‍റെ റിപ്പബ്ലിക് ദിന സന്ദേശം വായിച്ചു.

ദേശീയപതാക ഉയർത്തലും രാഷ്ട്രപതിയുടെ സന്ദേശവും ദേശഭക്തി പ്രതിഫലിപ്പിക്കുന്ന കലാവിരുന്നുകളുമായി ഇത്തവണവും നിറപ്പകിട്ടോടെ തന്നെയാണ് റിപ്പബ്ലിക് ദിനാഘോഷം നടന്നത്. ഖത്തറിലെ ഇന്ത്യൻ എംബസിയുടെ നേതൃത്വത്തിൽ നടന്ന റിപ്പബ്ലിക് ദിന പരിപാടികൾക്ക് ഇന്ത്യൻ കൾച്ചറൽ സെന്ററാണ് വേദിയായത്. ഇന്ത്യൻ എംബസി അപെക്സ് ബോഡികളായ ഐ.സി.സി, ഐ.സി.ബി.എഫ്, ഐ.എസ്.സി, ഐ.ബി.പി.സി തുടങ്ങിയ സംഘടനാ ഭാരവാഹികൾ, കമ്യൂണിറ്റി നേതാക്കൾ, എംബസി ഉദ്യോഗസ്ഥർ, പ്രവാസികൾ ഉൾപ്പെടെ നിരവധി പേർ ചടങ്ങിൽ പങ്കാളികളായി .

ഐ.സി.സി പ്രസിഡന്‍റ് എ.പി. മണികണ്ഠൻ സ്വാഗതം പറഞ്ഞ ചടങ്ങിൽ അപെക്സ് ബോഡി പ്രസിഡന്‍റുമാരായ ഷാനവാസ് ബാവ, എ.പി. മണികണ്ഠൻ, ഇ.പി. അബ്ദുറഹ്മാൻ, ത്വാഹാ മുഹമ്മദ് എന്നിവർ ചേർന്ന് അംബാസിഡറെ സ്വീകരിച്ചു. ഖത്തർ അമീർ ഷെയ്ഖ് തമീം ബിൻ ഹമദ് അൽതാനി, ഡപ്യൂട്ടി അമീർ ഷെയ്ഖ് അബ്ദുല്ല ബിൻ ഹമദ് അൽതാനി എന്നിവർ രാഷ്ട്രപതി ദ്രൗപദി മുർമുവിന് അഭിനന്ദനങ്ങൾ അറിയിച്ചു.

ഖത്തറിലെ വിവിധ ഇന്ത്യൻ സ്കൂളുകളിലും റിപ്പബ്ലിക് ദിനാഘോഷം നടന്നു.

എം.ഇ.എസ് ഇന്ത്യൻ സ്കൂളിൽ സ്കൂൾ മാനേജിങ് കമ്മിറ്റി ജനറൽ സെക്രട്ടറി ഹസ്മൽ ഇസ്മായിൽ ദേശീയ പതാക ഉയർത്തി. നോബിൾ ഇന്‍റർനാഷനൽ സ്കൂളിൽ സ്കൂൾ ചെയർമാൻ ഹുസൈൻ മുഹമ്മദ് യു, ട്രഷറർ ഷൗക്കത്തലി താജ് എന്നിവർ ചേർന്ന് പതാക ഉയർത്തി. വൈസ് പ്രിൻസിപ്പൽ റോബിൻ കെ. ജോസ് സ്വാഗതം പറഞ്ഞു. ബിർള പബ്ലിക് സ്കൂൾ, ശാന്തിനികേതൻ ഇന്ത്യൻ സ്കൂൾ, ഡിപിഎസ് മോഡേൺ ഇന്ത്യൻ സ്കൂൾ, ഐഡിയൽ ഇന്ത്യൻ സ്കൂൾ, ഭവൻസ് പബ്ലിക് സ്കൂൾ, ഒലിവ് ഇന്‍റർനാഷണൽ സ്കൂൾ തുടങ്ങിയ സ്ഥാപനങ്ങളിലും റിപ്പബ്ലിക് ദിനാഘോഷം നടന്നു.