film industry Shocked By Nishad's Death

മലയാള സിനിമയില്‍ തന്റെ കഴിവ് തെളിയിച്ച് തമിഴ് സിനിമാ ലോകത്തേക്ക് ചേക്കേറുന്നതിനിടെയാണ് ഫിലിം എഡിറ്റര്‍ നിഷാദ് യൂസഫിന്റെ വിടവാങ്ങല്‍.സൂര്യയുടെ സിനിമാ ജീവിതത്തിലെ പ്രധാനപ്പെട്ട സിനിമകളിലൊന്നായിരിക്കുമെന്ന് സിനിമാ ലോകം പ്രവചിക്കുന്ന കങ്കുവയുടെ എഡിറ്ററായിരുന്നു നിഷാദ്. രണ്ടു ദിവസം മുമ്പ് നടന്ന കങ്കുവയുടെ ഓഡിയോ ലോഞ്ചിനും നിഷാദ് പങ്കെടുത്തിരുന്നു. അന്ന് സൂര്യക്കൊപ്പം നില്‍ക്കുന്ന ചിത്രങ്ങളും നിഷാദ് തന്റെ സോഷ്യല്‍മീഡിയ അക്കൗണ്ടുകളില്‍ പങ്കുവച്ചിരുന്നു. നിഷാദിന്റെ വിടവാങ്ങലില്‍ മമ്മൂട്ടി ഉള്‍പ്പെടെയുള്ള താരങ്ങള്‍ അനുശോചനം രേഖപ്പെടുത്തി.

കങ്കുവയിലൂടെ തന്റെ കരിയറിന്റെ ഉന്നതിയിലേക്ക് എത്തുന്നതിനിടയാണ് നിഷാദിന്റെ വിയോഗം. നിഷാദ് എഡിറ്റ് ചെയ്ത് വരാനിരിക്കുന്ന ചിത്രങ്ങളെല്ലാം ആരാധകര്‍ കാത്തിരിക്കുന്ന ചിത്രങ്ങളാണ്. മമ്മൂട്ടി നായകനായെത്തുന്ന ബസൂക്ക, ഖാലിദ് റഹ്‌മാന്‍ സിനിമയായ ജിംഖാന, മോഹന്‍ലാല്‍ നായകനായെത്തുന്ന തരുണ്‍ മൂര്‍ത്തി ചിത്രത്തിന്റെയും എഡിറ്റര്‍ നിഷാദായിരുന്നു. ബുധനാഴ്ച പുലര്‍ച്ചെയാണ് കൊച്ചിയിലെ ഫ്‌ലാറ്റില്‍ മരിച്ച നിലയില്‍ നിഷാദിനെ കണ്ടെത്തിയത്. ഹരിപ്പാട് സ്വദേശിയായ നിഷാദ് യൂസഫ് കൊച്ചിയില്‍ ഭാര്യയ്ക്കും രണ്ട് മക്കള്‍ക്കും ഒപ്പമാണ് കൊച്ചി പനമ്പള്ളി നഗറിലെ ഫ്‌ലാറ്റില്‍ താമസിച്ചിരുന്നത്.ചാവേര്‍, തല്ലുമാല, ഉണ്ട, വണ്‍, സൗദി വെള്ളക്ക എന്നീ ചിത്രങ്ങളിലൂടെയാണ് നിഷാദ് ശ്രദ്ധേയനായത്. 2022 -ല്‍ തല്ലുമാല സിനിമയുടെ എഡിറ്റിങ്ങിന് മികച്ച ചിത്രസംയോജകനുളള സംസ്ഥാന അവാര്‍ഡും ലഭിച്ചിട്ടുണ്ട്.