കാനോർമ്മയിൽ അലിഞ്ഞ്

കോട്ടയം: സിപിഐ മുൻ സംസ്ഥാന സെക്രട്ടറി കാനം രാജേന്ദ്രന്റെ ഒന്നാം ചരമ വാർഷികത്തിന്റെ ഭാഗമായി ബസേലിയോസ് കോളജിൽ സംഘടിപ്പിച്ച 'കനലോർമ, കാനം' സ്‌നേഹസായാഹ്നം കാനത്തിന്റെ കനലോർമ്മയായി. സ്‌നേഹസായാഹ്നത്തിൽ രാഷ്ട്രീയ നേതാക്കളുടെയും പ്രമുഖ വ്യക്തികളുടെയും വലിയ നിരയായിരുന്നു. ഓർത്തഡോക്‌സ്‌ സഭാധ്യക്ഷൻ ബസേലിയോസ്‌ മാർത്തോമ മാത്യൂസ്‌ തൃതീയൻ കാതോലിക്കാ ബാവാ മുഖ്യപ്രഭാഷണം നടത്തി. സത്യം പറയുന്ന, തെറ്റുണ്ടായാൽ തിരുത്താൻ മനസ്സുകാട്ടുന്ന മനുഷ്യസ്നേഹിയായിരുന്നു കാനം രാജേന്ദ്രനെന്ന് കാതോലിക്കാ ബാവ പറഞ്ഞു. കാനം രാജേന്ദ്രൻ തന്നെ കോളജ്‌ തെരഞ്ഞെടുപ്പിൽ മത്സരിപ്പിച്ചതായി ബാല്യകാല സുഹൃത്തും ഓർത്തഡോക്‌സ്‌ സഭ പരമാധ്യക്ഷനുമായ ബസേലിയോസ്‌ മാർത്തോമ മാത്യൂസ്‌ തൃതീയൻ കാതോലിക്കാ ബാവാ പറഞ്ഞു. കോളജ്‌ പഠനം കഴിഞ്ഞ്‌ വൈദികപഠനത്തിലേക്ക്‌ തിരിഞ്ഞ്തോടെ രാഷ്‌ട്രീയമൊക്കെ വിട്ടതായും ബാവാ കൂട്ടിച്ചേർത്തു.

അഭിപ്രായങ്ങൾ ശക്തമായി പറയുകയും നിലപാടിൽ ഉറച്ചുനിൽക്കുകയും ചെയ്‌ത നേതാവായിരുന്നു കാനമെന്ന്‌ വൈക്കം വിശ്വൻ പറഞ്ഞു. സഹോദരതുല്യമായ സ്‌നേഹം തന്നയാളായിരുന്നു കാനം രാജേന്ദ്രനെന്ന്‌ രമേശ്‌ ചെന്നിത്തലയും അനുസ്‌മരിച്ചു.

മുതിർന്ന സിപിഎം നേതാവ്‌ വൈക്കം വിശ്വൻ, മന്ത്രി ജി ആർ അനിൽ, രമേശ്‌ ചെന്നിത്തല, പന്ന്യൻ രവീന്ദ്രൻ, കെ ഫ്രാൻസിസ്‌ ജോർജ്‌ എംപി, ചീഫ്‌ വിപ്പ്‌ ഡോ. എൻ ജയരാജ്‌, സിപിഎം ജില്ലാ സെക്രട്ടറിയറ്റംഗം കെ സുരേഷ്‌കുറുപ്പ്‌, തിരുവഞ്ചൂർ രാധാകൃഷ്‌ണൻ എംഎൽഎ, സംവിധായകൻ വിനയൻ, കോൺഗ്രസ്‌ നേതാവ്‌ കെ സി ജോസഫ്‌, പി സി തോമസ്‌, ലതിക സുഭാഷ്‌, അഡ്വക്കറ്റ്‌ ജനറൽ കെ ഗോപാലകൃഷ്‌ണകുറുപ്പ്‌, സിപിഐ ജില്ലാ സെക്രട്ടറി വി ബി ബിനു, കുര്യൻ കെ തോമസ്‌, സിപിഎം കോട്ടയം ജില്ലാ സെക്രട്ടറി എ വി റസൽ, ദേശാഭിമാനി ജനറൽ മാനേജർ കെ ജെ തോമസ്‌, സിപിഎം സംസ്ഥാന കമ്മറ്റിയംഗം അഡ്വ. കെ അനിൽകുമാർ, ആന്റോ ആന്റണി എംപി, പ്രൊഫ. ലോപ്പസ്‌ മാത്യു, എംഎൽഎമാരായ സി കെ ആശ, സെബാസ്‌റ്റ്യൻ കുളത്തുങ്കൽ, മാണി സി കാപ്പൻ, മോൻസ്‌ ജോസഫ്‌, ജില്ലാ പഞ്ചായത്ത്‌ പ്രസിഡന്റ്‌ കെ വി ബിന്ദു, ഡിസിസി പ്രസിഡന്റ്‌ നാട്ടകം സുരേഷ്‌, രവി ഡി സി, പി കെ ആനന്ദക്കുട്ടൻ എന്നിവർ പങ്കെടുത്തു. കാനത്തിന്റെ ചിത്രം ഭാര്യ വനജ രാജേന്ദ്രന്‌ കാതോലിക്കാ ബാവാ സമ്മാനിച്ചു. മകൻ സന്ദീപ്‌ രാജേന്ദ്രനും പങ്കെടുത്തു. ഗായിക പി കെ മേദിനി വിപ്ലവഗാനം പാടി. ഡോ. വി എൽ ജയപ്രകാശിന്റെ വയലിൻ അവതരണവും നടന്നു.

Tags:

1st Death Anniversary Kanam Rajendran