ഇസ്രായേലും ഭീകര സംഘടനയായ ഹമാസും തമ്മിലുള്ള സംഘര്‍ഷത്തില്‍ മിഡില്‍ ഈസ്റ്റില്‍ പിരിമുറുക്കം ഉയരുന്നതിനിടെ ഇന്ത്യന്‍ പൗരന്മാര്‍ക്ക് മുന്നറിയിപ്പ് നല്‍കി ഇന്ത്യന്‍ എംബസ്സി. ജാഗ്രത പാലിക്കാനും അനാവശ്യ യാത്രകള്‍ ഒഴിവാക്കാനുമാണ് ഇസ്രായേലിലെ ഇന്ത്യന്‍ എംബസി പൗരന്മാരോട് നിര്‍ദ്ദേശിച്ചത്.

''മേഖലയില്‍ നിലവിലുള്ള സാഹചര്യം കണക്കിലെടുത്ത്, ഇസ്രായേലിലെ എല്ലാ ഇന്ത്യന്‍ പൗരന്മാരും ജാഗ്രത പാലിക്കാനും പ്രാദേശിക അധികാരികളുടെ ഉപദേശപ്രകാരം സുരക്ഷാ പ്രോട്ടോക്കോളുകള്‍ പാലിക്കാനും നിര്‍ദ്ദേശിക്കുന്നു,'' എംബസി എക്സില്‍ പോസ്റ്റ് ചെയ്തു.

'ദയവായി ജാഗ്രത പാലിക്കുക, രാജ്യത്തിനുള്ളിലെ അനാവശ്യ യാത്രകള്‍ ഒഴിവാക്കുക, സുരക്ഷാ ഷെല്‍ട്ടറുകള്‍ക്ക് സമീപം തുടരുക. എംബസി സ്ഥിതിഗതികള്‍ സൂക്ഷ്മമായി നിരീക്ഷിച്ച് വരികയും നമ്മുടെ എല്ലാ പൗരന്മാരുടെയും സുരക്ഷ ഉറപ്പാക്കാന്‍ ഇസ്രായേല്‍ അധികാരികളുമായി നിരന്തരം സമ്പര്‍ക്കം പുലര്‍ത്തുകയും ചെയ്യുന്നു,' ഉപദേഷ്ടാവ് കൂട്ടിച്ചേര്‍ത്തു.

ഇത് കൂടാതെ ഏത് സഹായത്തിനും ബന്ധപ്പെടാന്‍ പൗരന്മാര്‍ക്കായി ഇന്ത്യന്‍ എംബസി രണ്ട് കോണ്‍ടാക്റ്റ് നമ്പറുകളും ഇമെയില്‍ ഐഡിയും പങ്കിട്ടു-- +972-547520711, +972-543278392--മെയില്‍ ഐഡി -- cons1.telaviv@mea.gov.in.

നേരത്തെ, ടെല്‍ അവീവിലേക്കും തിരിച്ചുമുള്ള ഫ്‌ലൈറ്റ് ഓപ്പറേഷനുകള്‍ ഓഗസ്റ്റ് 8 വരെ എയര്‍ ഇന്ത്യ നിര്‍ത്തിവച്ചിരുന്നു.

''മിഡില്‍ ഈസ്റ്റിന്റെ ചില ഭാഗങ്ങളില്‍ നടന്നുകൊണ്ടിരിക്കുന്ന സാഹചര്യം കണക്കിലെടുത്ത്, 2024 ഓഗസ്റ്റ് 08 വരെ ഉടന്‍ പ്രാബല്യത്തില്‍ വരുന്ന തരത്തില്‍ ടെല്‍ അവീവിലേക്കും പുറത്തേക്കും ഞങ്ങളുടെ വിമാനങ്ങളുടെ ഷെഡ്യൂള്‍ ചെയ്ത പ്രവര്‍ത്തനം ഞങ്ങള്‍ താല്‍ക്കാലികമായി നിര്‍ത്തിവച്ചിരിക്കുന്നു,'' എയര്‍ഇന്ത്യ പ്രസ്താവനയില്‍ പറയുന്നു.

തെഹ്റാനിലെ ഹമാസ് തലവന്‍ ഇസ്മായില്‍ ഹനിയേയും ഹിസ്ബുള്ളയുടെ ഏറ്റവും മുതിര്‍ന്ന സൈനിക മേധാവിയും ഇസ്രായേല്‍ ഗോലാന്‍ കുന്നുകളില്‍ റോക്കറ്റ് ആക്രമണത്തില്‍ കൊല്ലപ്പെട്ടതിനെ തുടര്‍ന്നാണ് മിഡില്‍ ഈസ്റ്റില്‍ സംഘര്‍ഷം ഉയര്‍ന്നിരുന്നത്. രണ്ട് തീവ്രവാദി നേതാക്കള്‍ കൊല്ലപ്പെട്ടതിനെത്തുടര്‍ന്ന് മിഡില്‍ ഈസ്റ്റ് സംഘര്‍ഷം ഒഴിവാക്കാന്‍ യുഎന്‍ രക്ഷാസമിതി (യുഎന്‍എസ്സി) നയതന്ത്ര ശ്രമങ്ങള്‍ ശക്തമാക്കിയിട്ടുണ്ട്.