Vaikkathasthami; Kulavazhappuzha Bhaktibharam held on Sunday evening.

വൈക്കം: വൈക്കത്തഷ്ടമിക്ക് മുന്നോടിയായി ഞായറാഴ്ച വൈകിട്ട് നടന്ന കുലവാഴപ്പുറപ്പാട് ഭക്തിനിർഭരമായി. വൈക്കം ടൗണിലെ സംയുക്ത എൻ.എസ്.എസ്. കരയോഗങ്ങളുടെ നേതൃത്വത്തിലാണ് ചടങ്ങ് നടന്നത്. ആറാട്ടുകളങ്ങര ക്ഷീര വൈകുണ്ഠപുരം പാർത്ഥസാരഥി ക്ഷേത്രത്തിൽ നിന്നും ആരംഭിച്ച കുലവാഴപ്പുറപ്പാടിന് 1573 നമ്പർ കിഴക്കുംചേരി നടുവിലെ മുറി കരയോഗം ആഥിഥേയത്വം വഹിച്ചു. താലപ്പൊലി, വിവിധ വാദ്യമേളങ്ങൾ, മുത്തുക്കുട, ഗജവീരൻ എന്നിവ അകമ്പടിയായി. 1820 നമ്പർ പടിഞ്ഞാറ്റും ചേരി തെക്കെ മുറി, കിഴക്കും ചേരി വടക്കെ മുറി, കിഴക്കും ചേരി നടുവിലേ മുറി, കിഴക്കും ചേരി തെക്കെ മുറി, പടിഞ്ഞാറ്റുംചേരി വടക്കേ മുറി, പടിഞ്ഞാറ്റും ചേരി പടിഞ്ഞാറെ മുറി എന്നി കരയോഗങ്ങളിലെ വനിതകൾ അടക്കം നൂറു കണക്കിന് പേർ കുലവാഴ പുറപ്പാടിൽ അണിചേർന്നു. മുരിയൻ കുളങ്ങര, ദളവാക്കുളം, കിഴക്കേ നട, പടിഞ്ഞാറെ നട വഴി വടക്കേ ഗോപുരനടയിൽ എത്തിച്ചേർന്നു. തുടർന്ന് ക്ഷേത്ര ഭാരവാഹികൾ എത്തി ക്ഷേത്രത്തിലേക്ക് ആനയിച്ചു. കുലവാഴകളും കരിക്കിൻ കുലകളും കൊടിമരച്ചുവട്ടിൽ സമർപ്പിച്ചു. തുടർന്ന് ക്ഷേത്രത്തിന്റെ പ്രധാന ഭാഗങ്ങളിൽ ഇവ കെട്ടി അലങ്കരിച്ചു. യൂണിയൻ പ്രസിഡൻ്റ് പി.ജി.എം. നായർ കാരിക്കോട്, സെക്രട്ടറി അഖിൽ ആർ. നായർ, അംഗങ്ങളായ പി.എൻ. രാധകൃഷ്ണൻ, എസ്.യു. കൃഷ്ണകുമാർ കരയോഗം ഭാരവാഹികൾ തുടങ്ങിയവർ നേതൃത്വം നല്കി.ഒന്നും രണ്ടും ഉത്സവങ്ങളിൽ കരയോഗങ്ങളുടെ നേതൃത്വത്തിൽ അഹസും കലാപരിപാടികളും നടക്കും.