മസ്‌കറ്റ്: ‘ഗൾഫ്​ മാധ്യമം’ സംഘടിപ്പിക്കുന്ന ‘സോക്കർ കാർണിവൽ ഏപ്രിൽ 25, 26 തീയതികളിൽ ബൗഷർ ക്ലബ്​ സ്​റ്റേഡിയത്തിൽ നടക്കുമെന്ന്​ അൽഖുവൈർ ഫുഡ്​ലാൻറ്​​ റസ്റ്ററന്‍റിൽ നടന്ന വാർത്തസമേള്ളനത്തിൽ സംഘാടകർ അറിയിച്ചു. 

ഫുട്​ബാൾ മത്സരങ്ങളും വിനോദ പരിപാടികളും സംയോജിപ്പിച്ചുള്ള ‘സോക്കർ കാർണിവലി’ൽ മസ്കറ്റിലെ പ്രമുഖരായ 16 ടീമുകളാണ്​ അങ്കം കുറിക്കുന്നത്​. തലസ്ഥാന നഗരി​ ഇ​ന്നേവരെ കണ്ടിട്ടില്ലാത്ത സെവൻസ്​ ഫുട്​ബാൾ ടൂർണമെന്‍റിന്‍റെ ആഘോഷ രാവുകൾക്കാണ്​ വിസിൽ മുഴങ്ങുന്നതെന്ന്​ സംഘാടകർ അറിയിച്ചു. ​ 

ആദ്യദിനം രാത്രി പത്ത്​ മണിക്കാണ്​ മത്സരങ്ങൾ തുടങ്ങുക. ​ഗ്രൂപ്പ്​ സ്​റ്റേജ്​ മത്സരങ്ങളാണ്​ ​ ഈ ദിവസം നടക്കുക. ക്വാർട്ടർ മുതൽ ഫൈനൽവരെയുള്ള മത്സരം 26ന്​ വൈകീട്ട്​ നാലുമുതൽ തുടങ്ങും. വിജയികൾക്ക്​ 600 റിയാലും വിന്നേഴ്​സ്​ ട്രോഫിയും രണ്ടാം സ്ഥാനത്തെത്തുന്നവർക്ക്​ 300 റിയാലും റണ്ണേഴ്​സ്​ ട്രോഫിയും നൽകും​. കൂടാ​തെ മികച്ച കളിക്കാർക്കും മറ്റും പ്രോത്സാഹന സമ്മാനങ്ങളും നൽകും. 

കേരള മസ്കറ്റ്​ ഫുട്​ബാൾ അസോസിയേഷനുമായി (കെ. എം.എഫ്​.എ) സഹകരിച്ചാണ്​ ഫുട്​ബാൾ കാർണിവൽ നടത്തുന്നത്​. പ്രവേശനം സൗജന്യമാണ്​. ഈ രണ്ട്​ ദിനങ്ങളിലും കുട്ടികൾക്കും കുടുംബത്തിനും​ ആസ്വദിക്കാവുന്ന വിവിധങ്ങളായ വിനോദ പരിപാടികളും മത്സരങ്ങളും ഉണ്ടാകും​. ഇതിൽ വിജയികളാകുന്നവർക്ക്​ കൈ നിറയെ സമ്മാനങ്ങളും നേടാനാകും. 

രൂചിയുടെ മേളപ്പെരുക്കം തീർത്ത്​ ഫുഡ്​ കോർണറുകൾ, കുട്ടികൾക്കും സ്ത്രീകൾക്കുമായുള്ള വിവിധ ഗെയിമുകൾ, ക്വിസ്​ മത്സരങ്ങൾ, ഫേസ്​ പെയിന്‍റിങ്,​ കസേരക്കളി, മറ്റ്​ മത്സരങ്ങളും നടക്കും. 

‘സോക്കർ കാർണിവൽ’ലിൽ ആവേശം തീർക്കാൻ മുൻ ഇന്ത്യൻ താരം അനസ്​ എട​ത്തൊടികയും കുടുംബ പ്രേക്ഷകരുടെ പ്രിയതാരവുമായ രാജ്​ കലേഷും എത്തും. മുഖ്യാതിഥിയായാണ്​ അനസ്​ സംബന്ധിക്കുക. മത്സരത്തിന്റെ തത്സമയ വിവരണത്തിന് ​ മലപുറത്തുനിന്നുള്ള റാഷിദ്​ കോട്ടക്കലും എത്തും. സോക്കർ കാർണിവലിന്‍റെ ലോഗോ പ്രകാശനവും ടീം നറു​ക്കെടുപ്പും നടന്നു. സോക്കർ കാർണിവൽ സംഘാടക സമിതി, സ്പോൺമാർ എന്നിവർ ചേർന്നാണ്​ ലോ​ഗോ പ്രകാശനം ചെയ്തത്​. ടീം നുറക്കെടുപ്പിന്​ സോക്കർ കാർണിവൽ കമ്മിറ്റി കൺവീനർ അർഷാദ്​ പെരിങ്ങാല, കമ്മിറ്റി അംഗം മുഹമ്മദ്​ റഫീഖ്​ എന്നിവർ നേതൃത്വം നൽകി