കഥയ്ക്ക് മുന്നോട്ട് പോകാൻ ഇത്തരം സീനുകൾ ആവശ്യമാണെന്ന് ഞാൻ വിശ്വസിക്കുന്നില്ല...സെക്‌സ് സീനുകളില്‍ അഭിനയിക്കില്ലെന്ന് കരീന കപൂര്‍

സിനിമയിലെ സെക്‌സ് സീനുകളില്‍ അഭിനയിക്കാന്‍ താല്പര്യക്കുറവുണ്ടായിരുന്നുവെന്ന് നടി കരീനകപൂര്‍. ഇക്കഴിഞ്ഞ ദിവസം ഡേര്‍ട്ടി മാഗസിനു വേണ്ടി ഹോളിവുഡ് നടി ഗില്ലിയന്‍ ആന്‍ഡേഴ്സണുമായി നടത്തിയ അഭിമുഖത്തിലാണ് താരം ഇക്കാര്യം വ്യക്തമാക്കിയത്. സിനിമകളിലെ കരീനയുടെ വേഷങ്ങള്‍, സെക്‌സ് സീനുകളുടെ ചിത്രീകരണം തുടങ്ങിയ വിഷയങ്ങളെക്കുറിച്ചായിരുന്നു ഇരുവരും ചര്‍ച്ച ചെയ്തത്. തന്റെ 25 വര്‍ഷത്തെ സിനിമാ ജീവിതത്തില്‍ ഇതുവരെയും ഒരു സെക്‌സ് സീന്‍ സ്‌ക്രീനില്‍ അവതരിപ്പിച്ചിട്ടില്ല. ഒരു അഭിനേത്രി എന്ന നിലയില്‍ മനഃപൂര്‍വം എടുത്ത ഒരു തീരുമാനമാണിതെന്നും 44 കാരിയായ കരീന കപൂര്‍ അഭിമുഖത്തില്‍ തുറന്നു പറഞ്ഞു.

എന്തുകൊണ്ടാണ് അത്തരം രംഗങ്ങള്‍ ചെയ്യാന്‍ താല്‍പ്പര്യമില്ലാത്തതെന്ന ആന്‍ഡേഴ്സണിന്റെ ചോദ്യത്തിന് കരീന നല്‍കിയ മറുപടി ഇങ്ങനെയാണ് ''ഒരു കഥയ്ക്ക് മുന്നോട്ട് പോകാന്‍ ഇത്തരം സീനുകള്‍ ആവശ്യമാണെന്ന് ഞാന്‍ വിശ്വസിക്കുന്നില്ല. അതുകൊണ്ടുതന്നെ ഞാന്‍ ഒരിക്കലും അത് ചെയ്തിട്ടില്ല'' എന്നായിരുന്നു. അതേസമയം, കരീനയുടെ കരിയറിലെ ഏറ്റവും മികച്ച പ്രകടനങ്ങളിലൊന്നാണ് 2003 ല്‍ പുറത്തിറങ്ങിയ ചമേലിയിലേത്. ചിത്രത്തില്‍ ലൈംഗിക തൊഴിലാളിയുടെ വേഷമാണ് കരീന അവതരിപ്പിച്ചത്. തന്റെ കരിയറിന്റെ പീക്കില്‍ നില്‍ക്കുമ്പോഴായിരുന്നു ഇങ്ങനെ ബോള്‍ഡായൊരു തീരുമാനത്തിലേക്ക് കരീനയെത്തുന്നത്. അതുവരെ ബോളിവുഡില്‍ കണ്ട് ശീലിച്ച കരീനയെയായിരുന്നില്ല ചമേലിയില്‍ കണ്ടത്.

എന്നാല്‍ വിവാഹശേഷം, സിനിമയില്‍ അഭിനയിക്കുമ്പോള്‍ പങ്കാളിയല്ലാതെ മറ്റൊരാളുമായി ചുംബന രംഗം ചെയ്യില്ലെന്ന് കരീന കപൂറും സെയ്ഫ് അലി ഖാനും തീരുമാനിച്ചിരുന്നത് പാപ്പരാസികള്‍ക്കിടയിലും ബോളിവുഡ് മേഖലയിലും വലിയ വാര്‍ത്തയായിരുന്നു. സത്യാഗ്രഹ (2013), ഹീറോയിന്‍ (2012) തുടങ്ങിയ ചിത്രങ്ങളിലെ അത്തരം രംഗങ്ങള്‍ താരത്തിന്റെ നിര്‍ബന്ധപ്രകാരം തിരക്കഥയില്‍ നിന്ന് ഒഴിവാക്കിയിരുന്നു. ബോളിവുഡിലെ സ്റ്റാര്‍ കപ്പിളായ സെയ്ഫും കരീനയും പ്രണയത്തിലാകുന്നത് ടഷന്‍ എന്ന സിനിമയുടെ ചിത്രീകരണത്തിനിടെയായിരുന്നു. അഞ്ച് വര്‍ഷത്തോളം ലിവിംഗ് ടുഗദറിലായിരുന്ന ഇരുവരും പിന്നീട് 2012ലാണ് വിവാഹം ചെയ്യുന്നത്. വിവാഹ ശേഷം നടിമാര്‍ അഭിനയം നിര്‍ത്തുകയോ ചെറിയ റോളുകളിലേക്ക് ഒതുങ്ങുകയോ ചെയ്യുന്ന പതിവ് തെറ്റിച്ച താരമാണ് കരീന കപൂര്‍. രണ്ട് കുട്ടികളുടെ അമ്മയായ ശേഷവും ബോളിവുഡിലെ സൂപ്പര്‍ നായികയായി തുടരുകയാണ് അവര്‍.

ബോളിവുഡിലെ സൂപ്പര്‍ താരകുടുംബമായ കപൂര്‍ കുടുംബത്തിലാണ് കരീനയുടെ ജനനം. രണ്‍ദീര്‍ കപൂറിന്റേയും ബബിതയുടേയും മകളാണ് കരീന. ചേച്ചി കരിഷ്മ കപൂറിന്റെ പാതയിലൂടെയാണ് കരീനയും സിനിമയിലെത്തുന്നത്. ഫിലിംഫെയര്‍ ഉള്‍പ്പടെ നിരവധി പുരസ്‌കാരങ്ങളും കരീനയെ തേടിയെത്തിയിട്ടുണ്ട്. ബോളിവുഡിലെ ഐക്കോണിക് നായികമാരില്‍ ഒരാളാണ് കരീന.