കാരന്തൂർ ഏട്ടകുണ്ട് റോഡിൽ ദുരിത യാത്ര

കുന്നമംഗലം: കുന്നമംഗലം പഞ്ചായത്തിൽ നിന്നും കുരുവട്ടൂർ പഞ്ചായത്തിലേക്ക് പ്രവേശിക്കുന്ന കാരന്തൂർ ഏട്ടകുണ്ട് റോഡ് തകർന്നതോടെ യാത്ര ദുരിതമായി. പഞ്ചായത്തിൻ്റെ കൈവശമുള്ള ഈ റോഡ് പിഡബ്ലിയുഡി ഏറ്റെടുത്ത് നവീകരിക്കാൻ പദ്ധതി തയ്യാറാക്കിയിരുന്നെങ്കിലും തീരുമാനമായില്ല. കുരുവട്ടൂർ പഞ്ചായത്തിൽ നിന്ന് മെഡിക്കൽ കോളേജ് ഭാഗത്തേക്ക് പോകുന്ന യാത്രക്കാർ ഉപയോഗിക്കുന്ന റോഡാണിത്. പാറക്കടവിൽ വലിയ പാലം നിർമ്മിച്ചിട്ടുണ്ടെങ്കിലും പാലത്തിന് സമാനമായി റോഡ് വികസനം ഇതു വരേ നടപ്പിലായിട്ടില്ല. കുരുവട്ടൂർ പഞ്ചായത്തിൻ്റെ കീഴിലുള്ള റോഡ് വീതി കുറവാണെങ്കിലും തകർന്നിട്ടില്ല. കുന്നമംഗലം പഞ്ചായത്തിൻ്റെ കീഴിലുള്ള പൂർണ്ണമായും തകർന്ന നിലയിലാണ്. കാരന്തൂർ മാപ്പിള സ്കൂളിലേക്ക് വരുന്ന നൂറുകണക്കിന് വിദ്യാർഥികൾ സഞ്ചരിക്കുന്ന റോഡാണിത്. സ്കൂളിന് സമീപമുള്ള ഇറക്കത്തിൽ ഇരുചക്ര വാഹന യാത്രക്കാർ അപകടത്തിൽപ്പെടുന്നത് നിത്യ സംഭവമാണ്. ഈ റോഡ് വികസിപ്പിച്ചാൽ കുരുവട്ടൂർ, പറമ്പിൽ ബസാർ . കക്കോടി, ചേളന്നൂർ, ബാലുശ്ശേരി എന്നിവിടങ്ങളിലേക്ക് എളുപ്പത്തിൽ എത്തിച്ചേരാൻ സാധിക്കും. ഇത് മനസ്സിലാക്കിയാണ് പിഡബ്ലിയുഡി ഈ റോഡ് ഏറ്റെടുക്കാൻ പദ്ധതി തയ്യാറാക്കിയിരുന്നത്. എന്നാൽ ഈ പദ്ധതി നടപ്പിലാവുകയും ചെയ്തില്ല എന്നു മാത്രമല്ല പഞ്ചായത്ത് ഈ റോഡിൽ അറ്റകുറ്റപണി പോലും നടത്തുകയും ചെയ്തിട്ടില്ല. എത്രയും പെട്ടന്ന് റോഡ് ഗതാഗത യോഗ്യമാക്കണമെന്നാണ് നാട്ടുകാരുടെ ആവശ്യം.