ഏപ്രിലില്‍ 14 ദിവസം ബാങ്കുകള്‍ അവധി;

കടുത്തുരുത്തി: 2026 ഏപ്രിലില്‍ 14 ദിവസം ബാങ്കുകള്‍ അവധി ആയിരിക്കും. ഇതില്‍ ഞായറാഴ്ചകള്‍, രണ്ടാമത്തെയും നാലാമത്തെയും ശനിയാഴ്ചകള്‍, നിരവധി പ്രാദേശിക ഉത്സവങ്ങള്‍ എന്നിവ ഉള്‍പ്പെടും. ആ ദിവസങ്ങള്‍ ഏതാണെന്ന് അറിഞ്ഞിരിക്കുന്നത് അസൗകര്യം ഒഴിവാക്കാൻ നല്ലതാണ്.

ഏപ്രില്‍ 1-ാം തീയതി തന്നെ അവധി ദിവസത്തോടെയാണ് ആരംഭിക്കുന്നത്. പുതിയ സാമ്പത്തിക വർഷത്തിന്റെ തുടക്കവും വാർഷിക അക്കൗണ്ട് ക്ലോസിംഗ് പ്രക്രിയയും അടയാളപ്പെടുത്തുന്നതിനായി രാജ്യത്തുടനീളമുള്ള ബാങ്കുകള്‍ ഈ ദിവസം അവധി ആയിരിക്കും. നാല് ഞായറാഴ്ചകള്‍, രണ്ടാമത്തെയും നാലാമത്തെയും ശനിയാഴ്ച എന്നിവ അവധി ദിവസങ്ങളും ഉള്‍പ്പെടുന്നു. കൂടാതെ, വിവിധ സംസ്ഥാനങ്ങളിലെ ഉത്സവങ്ങളും പ്രത്യേക അവസരങ്ങളും കാരണം എട്ട് ദിവസങ്ങള്‍ കൂടി ബാങ്കുകള്‍ അടച്ചിടും. പക്ഷേ ഓരോ സംസ്ഥാനം അനുസരിച്ച്‌ അവധി ദിവസങ്ങള്‍ വ്യത്യാസപ്പെടാം. ദുഃഖവെള്ളി, അംബേദ്കർ ജയന്തി, ബൈശാഖി, വിഷു, തമിഴ് പുതുവത്സരം, ബിഹു എന്നിവയുള്‍പ്പെടെ നിരവധി പ്രധാന ഉത്സവങ്ങള്‍ ഈ മാസം വരുന്നുണ്ട്. ഈ അവസരങ്ങളില്‍ അതത് സംസ്ഥാനങ്ങളിലെ ബാങ്കുകള്‍ അവധി ആയിരിക്കും.

അതേസമയം ബാങ്ക് അവധി ദിനങ്ങള്‍ ഓണ്‍ലൈൻ സേവനങ്ങളെ ബാധിക്കില്ല. നെറ്റ് ബാങ്കിംഗ്, മൊബൈല്‍ ബാങ്കിംഗ്, എടിഎമ്മുകള്‍ എന്നിവ വഴി എളുപ്പത്തില്‍ പണം കൈമാറാനും ബില്ലുകള്‍ അടയ്ക്കാനും കഴിയും.

ബാങ്കുകള്‍ മാത്രമല്ല, ഏപ്രിലില്‍ 10 ദിവസത്തേക്ക് ഓഹരി വിപണിയും അടച്ചിടും. ശനി, ഞായർ ദിവസങ്ങളില്‍ എട്ട് ദിവസം വ്യാപാരം നിർത്തിവയ്ക്കും. കൂടാതെ, ഏപ്രില്‍ 3 ന് ദുഃഖവെള്ളിയാഴ്ചയും ഏപ്രില്‍ 14 ന് അംബേദ്കർ ജയന്തിയിലും വ്യാപാരം നിർത്തിവയ്ക്കും.