At Punna Sri Ayyappa Subramanya Temple, the Dedication Day Mahotsav and the Dedication Ceremony of Goddess Bhadrakali will be held on Friday

ചാവക്കാട്:പുന്ന ശ്രീഅയ്യപ്പ സുബ്രഹ്മണ്യ ക്ഷേത്രത്തിൽ പ്രതിഷ്ഠാദിന മഹോത്സവവും,ഭദ്രകാളി ദേവിയുടെ പ്രതിഷ്ഠാ കര്‍മ്മവും വെള്ളിയാഴ്ച്ച നടക്കുമെന്ന് ഭാരവാഹികൾ വാർത്താസമ്മേളനത്തില്‍ അറിയിച്ചു.രാവിലെ ഒമ്പതിന് ഗുരുവായൂര്‍ ക്ഷേത്രം തന്ത്രി ചേന്നാസ് ദിനേശന്‍ നമ്പൂതിരിപ്പാട് ഭദ്രകാളി ദേവിയുടെ പ്രതിഷ്ഠാകര്‍മ്മങ്ങള്‍ക്ക് മുഖ്യകാര്‍മ്മികത്വം വഹിക്കും.ക്ഷേത്രത്തില്‍ അയ്യപ്പ,സുബ്രഹ്മണ്യ,ഗണപതി പ്രതിഷ്ഠയ്ക്ക് പുറമെയാണ് ഭദ്രകാളിക്കും പ്രതിഷ്ഠ നടത്തുന്നത്.പുലര്‍ച്ചെ അഞ്ചിന് നടതുറക്കല്‍,ഗണപതിഹോമം എന്നിവ ഉണ്ടാവും.ഉച്ചതിരിഞ്ഞ് മൂന്നിന് വാദ്യമേളങ്ങളോടെയും,ആനയുടെയും അകമ്പടിയോടെ തിടമ്പെഴുന്നള്ളിപ്പ്,താഴിശ്ശേരി കുടുംബക്ഷേത്രത്തില്‍നിന്ന് ആന,ശിങ്കാരിമേളം,ഉടുക്കുപാട്ട്,സ്വാമി തുള്ളല്‍ എന്നിവയോടെ രുദ്ര ഉത്സവാഘോഷ കമ്മിറ്റിയുടെ പൂരം വരവ്,തുടര്‍ന്ന് പേരകം നവയുഗയുടെ എഴുന്നള്ളിപ്പ് എന്നിവ ഉണ്ടാവും.വൈകീട്ട് ദീപാരാധന ഉണ്ടാവും.പ്രതിഷ്ഠാദിന ചടങ്ങുകള്‍ ബുധനാഴ്ച മുതല്‍ ആരംഭിക്കും.വാർത്താസമ്മേളനത്തില്‍ ക്ഷേത്രം രക്ഷാധികാരി മോഹന്‍ദാസ് ചേലനാട്ട്,പ്രസിഡന്റ് പി.യതീന്ദ്രദാസ്,ജനറല്‍ സെക്രട്ടറി വി.പ്രേംകുമാര്‍,വൈസ് പ്രസിഡന്റ് വി.എ.സിദ്ധാർത്ഥൻ,സെക്രട്ടറിമാരായ ഇ.വി.ശശി,പി.സി.വേലായുധന്‍,ട്രസ്റ്റ് ബോർഡ് മെമ്പർ സി.കെ.ബാലകൃഷ്ണന്‍ എന്നിവർ പങ്കെടുത്തു.

Tags:

enlightmedia,malayalamnews,kerala,latestnews