Ahead of the Vaikathashtami Mahotsav, the work of Mukhya Sandhya has commenced; the four-day consecutive ceremony will conclude on the 20th.

വൈക്കം: വൈക്കത്തഷ്ടമി മഹോൽസവത്തിന്റെ മുന്നോടിയായി നടത്തുന്ന മുഖ സന്ധ്യ വേല ആരംഭിച്ചു. വിശേഷാൽ ചടങ്ങുകൾക്ക് ശേഷം എതൃത്ത ശ്രീബലിക്കായി വൈക്കത്തപ്പന്റെ തങ്കത്തിടമ്പ് പുറത്തേക്ക് എഴുന്നള്ളിച്ചു. .ഗജവീരൻ ചിറക്കടവ് തിരുനീലകണ്ഠൻ ഭഗവന്റെ തിടമ്പേറ്റി. വിവിധ വാദ്യമേളങ്ങളുടെ അകമ്പടിയോടെ ക്ഷേത്രത്തിന് മൂന്ന് പ്രദക്ഷിണം പൂർത്തിയാക്കി എഴുന്നളളിപ്പ് സമാപിച്ചു. വൈകിട്ട് 8 ന് വിളക്കെഴുന്നള്ളിപ്പും നടന്നു. രാവിലെയും വൈകിട്ടും ആന പുറത്ത് ശ്രീബലി, മണ്ഡപത്തിൽ വാരമിരിക്കൽ, പ്രാതൽ, വിളക്ക് എന്നിവയാണ് സന്ധ്യ വേലയുടെ പ്രധാന ചടങ്ങുകൾ. ദേവസ്വം ഭാരവാഹികളും ഭക്തരും ഉൽസവത്തിന് മുന്നോടിയായി വൈക്കത്തപ്പനെ വന്ദിച്ച് ആഘോഷപൂർവം നടത്തുന്ന ചടങ്ങാണ് മുഖ സന്ധ്യ വേല. ചടങ്ങുകൾക്ക് അഡ്മിനിസ്ട്രേറ്റിവ് ഓഫീസർ വി. ഈശ്വരൻ നമ്പൂതിരി നേതൃത്വം നൽകി. തുലാമാസത്തിലെ രേവതി നക്ഷത്രത്തിൽ തുടങ്ങി കാർത്തിക നാളിൽ സമാപിക്കുന്ന മുഖസന്ധ്യവേല ഏറ്റുമാനൂർ തെക്കുംകൂർ അമ്പലപ്പുഴ, തിരുവല്ല എന്നിവിടങ്ങളിലെ നാട്ടുരാജാക്കൻമാർ നടത്തിയിരുന്നതാണ്. ഇപ്പോൾ ദേവസ്വത്തിന്റെ അടിയന്തരമാണ്. .തുടർച്ചയായി നാലു ദിവസം നീണ്ടു നിൽക്കുന്ന മുഖ സന്ധ്യ വേല 20 ന് സമാപിക്കും. സമൂഹ സന്ധ്യ വേല നവംബർ. 7 ന് ആരംഭിക്കും . നവംബർ 7 ന് വൈക്കം സമൂഹം, 9 ന് തെലുങ്ക് സമൂഹം, 10 ന് തമിഴ് വിശ്വ ബ്രന്മ സമാജം, 11 ന് വടയാർ സമൂഹം എന്നിവയുടെ സന്ധ്യ വേലയും നടക്കും.