The Qatar Day parade at Durb al sai will kikoff on December 10.

ദോഹ: ഖത്തർ ദേശീയ ദിന പരിപാടികളുടെ പ്രധാന കേന്ദ്രമായ ദർബ് അൽ സാഇയിൽ ആഘോഷങ്ങൾക്ക് ഡിസംബർ 10ന് തുടക്കമാകും. ദേശീയ ദിനമായ ഡിസംബർ 18 വരെ നീണ്ടുനിൽക്കുന്നതാണ് ദർബ് അൽ സാഇയിലെ സ്ഥിരം വേദികളിലെ ആഘോഷങ്ങൾ. ദിവസവും വൈകീട്ട് മൂന്ന് മുതൽ രാത്രി 11 വരെ വിപുലമായ പരിപാടികളാണ് ആസൂത്രണം ചെയ്തിരിക്കുന്നതെന്ന് സാംസ്കാരിക മന്ത്രാലയം അറിയിച്ചു.

ഉം സലാലിലെ ദർബ് അൽ സാഇയാണ് കഴിഞ്ഞ ഏതാനും വർഷങ്ങളായി ഖത്തറിന്റെ ദേശീയ ദിന പരിപാടികളുടെ പ്രധാന കേന്ദ്രം. ഖത്തറിന്റെ സാംസ്കാരിക തനിമയും പൈതൃകവും വിളിച്ചോതുന്ന കലാപരിപാടികളും പ്രദർശനങ്ങളും മുതൽ വിവിധ ഷോകൾ, ശിൽപശാലകൾ, വിദ്യാഭ്യാസ പരിപാടികളും മത്സരങ്ങളും തുടങ്ങിയവയുമായി നിറപ്പകിട്ടാർന്ന ദേശീയ ദിന ഉത്സവത്തിനാണ് ഇത്തവണ ദർബ് അൽ സാഇ ഒരുങ്ങുന്നത്. കുട്ടികൾക്കും സ്ത്രീകൾക്കും മുതിർന്നവർക്കുമെല്ലാം ആഘോഷിക്കാനുള്ള വൈവിധ്യങ്ങളും ദർബ് അൽസാഇ ഒരുക്കും. കരകൗശല നിർമാണങ്ങളും പ്രദർശനങ്ങളും വിനോദ പരിപാടികളും ശ്രദ്ധേയമാണ്.

സാംസ്കാരിക മന്ത്രാലയമാണ് ആഘോഷങ്ങൾക്ക് ചുക്കാൻ പിടിക്കുന്നത്. രാജ്യത്തിന്റെ തനത് സാംസ്കാരം എടുത്തു കാട്ടുന്ന പരമ്പരാഗത കാഴ്ചകളാണ് ഇവിടുത്തെ പ്രത്യേകത.

രാജ്യത്തെ സ്വദേശികൾക്കും പ്രവാസികൾക്കും സന്ദർശകർക്കും ഒരുപോലെ ആസ്വദിക്കാനും പങ്കെടുക്കാനും കഴിയുന്ന തരത്തിൽ വിവിധ വിഭാഗങ്ങളിലാണ് പരിപാടികൾ നടക്കുന്നത്. പ്രധാന വേദിയിൽ മന്ത്രാലയങ്ങളുടെയും സർക്കാർ സ്ഥാപനങ്ങളുടെയും സഹകരണത്തോടെ വിദ്യാഭ്യാസ, സാംസ്കാരിക മത്സരങ്ങൾ ഉണ്ടാകും. വിജയികൾക്ക് ആകർഷകമായ സമ്മാനങ്ങളും ലഭിക്കും.