Plantation workers say they saw a tiger near Munnar town

മൂന്നാര്‍: മൂന്നാര്‍ ടൗണിന് സമീപം പുലിയെ കണ്ടതായി തോട്ടം തൊഴിലാളികള്‍. ടൗണിന് സമീപമുള്ള മൂന്നാര്‍ ഫോറസ്റ്റ് റെയിഞ്ച് ഓഫിസിന് സമീപമാണ് പുലിയുടെ സാന്നിധ്യം ശ്രദ്ധയില്‍പ്പെട്ടത്. സംഭവത്തില്‍ വനം വകുപ്പ് പരിശോധന നടത്തുന്നുണ്ട്. പുലിയെ കണ്ട തോട്ടം തൊഴിലാളികള്‍ സംഭവം വനം വകുപ്പ് ഉദ്യോഗസ്ഥരെ അറിയിക്കുകയായിരുന്നു. പുലിയുടെ സാന്നിധ്യം ശ്രദ്ധയില്‍പ്പെട്ട ഭാഗം കൊളുന്തെടുക്കാന്‍ മാത്രം തൊഴിലാളികള്‍ എത്തുന്ന ജനവാസമില്ലാത്ത പ്രദേശമാണ്. സംഭവത്തില്‍ വനം വകുപ്പ് പരിശോധന നടത്തുന്നുണ്ട്. കൂടുതല്‍ സംഘത്തെ നിയോഗിച്ച് പരിശോധന ശക്തമാക്കുമെന്ന് റേഞ്ച് ഓഫിസര്‍ സി. ബിജു പറഞ്ഞു.

ഇരുപതു പേരടങ്ങുന്ന രണ്ട് സംഘങ്ങളായാണ് പരിശോധന നടത്തുന്നത്. തോട്ടം മേഖലയിലെ വിവിധയിടങ്ങളില്‍ മുമ്പ് കടുവയുടെയും പുലിയുടെയുമൊക്കെ സാന്നിധ്യം ഉണ്ടായിട്ടുണ്ട്. കാട്ടുകൊമ്പന്‍മാരടക്കം മൂന്നാര്‍ മേഖലയില്‍ കാടിറങ്ങി ഭീതി പരത്തുന്ന സംഭവം സാധാരണയായി കഴിഞ്ഞിരിക്കുകയാണ്. ഇതിനൊപ്പമാണിപ്പോള്‍ പുലിപ്പേടിയും വര്‍ധിച്ചിട്ടുള്ളത്. കാട്ടാനകള്‍ക്ക് പുറമേ പുലിപ്പേടി കൂടി ആയാല്‍ ജീവിതം ദുസഹമാകുമെന്ന് നാട്ടുകാര്‍ പറയുന്നു. വന്യജീവി ആക്രമണത്തില്‍ വളര്‍ത്ത് മൃഗങ്ങള്‍ കൊല്ലപ്പെടുന്ന സാഹചര്യവുമുണ്ട്. വേനല്‍ കനക്കുന്നതോടെ വന്യജീവി ശല്യം വര്‍ധിക്കുമോയെന്ന ആശങ്ക നിലനില്‍ക്കെയാണ് മൂന്നാര്‍ ടൗണിന് ഏതാനും ദൂരമകലെ പുലിയുടെ സാന്നിധ്യമുണ്ടായിട്ടുള്ളത്.