MG University organised a folk song competition at Thayolaparamba DB College under the leadership of NSS Scheemen.

തലയോലപ്പറമ്പ്: നാടന്‍ ശീലുകളാല്‍ വിദ്യാര്‍ഥികള്‍ നിറഞ്ഞാടിയപ്പോള്‍ അതിനൊത്ത് താളം പിടിച്ച് സദസ്സും കൂടെക്കൂടി. നാടന്‍ കലാരൂപങ്ങളെ പ്രോത്സാഹിപ്പിക്കുന്നതിന്റെ ഭാഗമായി എം.ജി സര്‍വകലാശാല നാഷണല്‍ സര്‍വീസ് സ്‌കീമീന്റെ നേതൃത്വത്തില്‍ തലയോലപ്പറമ്പ് ഡി.ബി കോളേജില്‍ സംഘടിപ്പിച്ച നാടന്‍ പാട്ട് മത്സരമാണ് സദസ്സിന് ദൃശ്യ കലാവിരുന്നായത്. കേരളക്കരയിലെ മണ്‍മറഞ്ഞു പോകുന്ന ആചാര പെരുമകളെയും തപ്പ് താളങ്ങളെയും കോര്‍ത്തിണക്കി ജനപ്രിയ പാട്ടുകളുമായാണ് മത്സരാര്‍ഥികള്‍ അരങ്ങ് കൊഴുപ്പിച്ചത്. പി.ജി ഓഡിറ്റോറിയത്തില്‍ നടന്ന മത്സരങ്ങളുടെ ഉദ്ഘാടനം സാഹിത്യപ്രവര്‍ത്തക സഹകരണ സംഘം പ്രസിഡന്റ് അഡ്വ. പി.കെ ഹരികുമാര്‍ നിര്‍വഹിച്ചു. കോളേജ് പ്രിന്‍സിപ്പാള്‍ ഡോ. ആര്‍ അനിത അധ്യക്ഷത വഹിച്ചു. എന്‍എസ്എസ് പ്രോഗ്രാം കോ-ഓര്‍ഡിനേറ്റര്‍ ഡോ. ഇ.എന്‍ ശിവദാസന്‍, നാടന്‍ പാട്ട് സംഘം ഓര്‍ഗനൈസിങ് കോ-ഓര്‍ഡിനേറ്റര്‍ ഡോ. തോമസ് വര്‍ഗീസ്, കോളേജ് വൈസ് പ്രിന്‍സിപ്പാള്‍ കെ.പി ബീനമോള്‍, അസി. പ്രൊഫസര്‍ ലെഫ്. ഡോ. ഹരിനാരായണന്‍, പ്രോഗ്രാം ഓഫീസര്‍ ഡോ. പി.ആര്‍ രജിത്ത് എന്നിവര്‍ പ്രസംഗിച്ചു. കോട്ടയം, ഇടുക്കി, പത്തനംതിട്ട ജില്ലകളിലെ വിവിധ കോളേജുകളില്‍നിന്നുള്ള 12 ടീമുകളാണ് മത്സരത്തില്‍ പങ്കെടുത്തത്. ഫൈനല്‍ മത്സരം സെപ്റ്റംബര്‍ ഏഴിന് എം.ജി സര്‍വകലാശാല ക്യാമ്പസില്‍ നടക്കും.