Man who escaped from Kottayam district jail arrested

കോട്ടയം: കോട്ടയം ജില്ലാ ജയിലിൽനിന്ന് ചാടിപ്പോയ പ്രതി പിടിയിൽ. അസം സ്വദേശി അമിനുൾ ഇസ്ലാമാണ് അസമിൽനിന്ന് പിടിയിലായത്. ക‍ഴിഞ്ഞ ജൂൺ 30നാണ് ഇയാൾ ജയിൽ ചാടിയത്. ട്രെയിനിൽനിന്ന് മൊബൈൽ മോഷ്ടിച്ച കുറ്റത്തിന് റിമാൻഡിൽ കഴിയവെയാണ് ജയിൽ ചാടിയത്. ജയിലിൽ പരിശോധനയ്ക്ക് പുറത്തിറക്കിയപ്പോ‍ഴായിരുന്നു രക്ഷപ്പെട്ടത്.

ഉച്ചയ്ക്കുശേഷം മൂന്നിന് ജീവനക്കാരുടെ കണ്ണുവെട്ടിച്ച് മതിൽചാടി രക്ഷപ്പെട്ടെന്നാണ് ഉദ്യോഗസ്ഥർ നൽകിയ വിശദീകരണം. സംഭവത്തെ തുടർന്ന്, മധ്യമേഖല ജയിൽ ഡിഐജി രാജീവ് ടി ആർ ജയിലിലെത്തി പരിശോധന നടത്തുകയും സൂപ്രണ്ടിനോട് റിപ്പോർട്ട് തേടുകയും ചെയ്തിരുന്നു. സുരക്ഷ വീഴ്ചയുണ്ടായെന്ന് സ്പെഷ്യൽ ബ്രാഞ്ചും റിപ്പോർട്ട് നൽകിയിരുന്നു.

പൊലീസും ജയിൽ വകുപ്പ് ഉദ്യോഗസ്ഥരും പ്രതിയ്ക്കായി തിരച്ചിൽ ഊർജ്ജിതമാക്കി. കഴിഞ്ഞ കുറച്ച് ദിവസങ്ങളായി കോട്ടയത്തുനിന്നുള്ള പോലീസ് സംഘം അസം കേന്ദ്രീകരിച്ച് ഇയാൾക്കായി അന്വേഷണം നടത്തുകയായിരുന്നു. മൊബൈൽ മോഷണക്കെസുമായി ബന്ധപ്പെട്ടാണ് ഇയാളെ പിടികൂടിയിരുന്നത്. ഇയ്യാൾ ജയിലിൽ നിന്നും ചാടി പോയ പിറകെ കോട്ടയത്തുനിന്നുള്ള സംഘം ആസാമിൽ താമസിച്ച് അന്വേഷണം നടത്തി എങ്കിലും ഫലമുണ്ടായില്ല. തുടർന്ന് അസമിൽ നിന്നും കോട്ടയം പോലീസ് തിരിച്ചെത്തിയപ്പോഴാണ് പ്രതിയെ അസം പോലീസ് പിടികൂടിയത്.