മഞ്ചേരി: നയം പ്രഖ്യാപിച്ച് പി.വി.അൻവറിന്റെ ഡെമോക്രാറ്റിക് മൂവ്മെന്റ് ഓഫ് കേരള(ഡിഎംകെ). മലപ്പുറം, കോഴിക്കോട് ജില്ലകളെ വിഭജിച്ച് കേരളത്തിൽ പതിനഞ്ചാമത് ജില്ലകൂടി രൂപവത്കരിക്കണം എന്നതടക്കമുള്ള കാര്യങ്ങളാണ് മഞ്ചേരിയിലെ വേദിയിൽ വായിച്ച നയ വിശദീകരണ രേഖയിലുള്ളത്.

രാഷ്ട്രീയ സാമ്പത്തിക സാമൂഹിക നീതി, ജനാധിപത്യത്തിന് ജാ​ഗ്രതയുള്ള കാവൽ, കുട്ടികൾക്കും സ്ത്രീകൾക്കും സുരക്ഷ, പ്രവാസി വോട്ടവകാശം ഉറപ്പുവരുത്തണം, പോലീസ് സേനയെ നിയന്ത്രിക്കണം, മലബാറിനോടുള്ള അവ​ഗണന നിർത്തണം, കോഴിക്കോട്, മലപ്പുറം ജില്ലകളെ വിഭജിക്കണം, സ്റ്റാർട്ടപ്പുകളെ പ്രോത്സാഹിപ്പിക്കണം, സംരംഭക സംരക്ഷണ നിയമം നടപ്പിലാക്കണം, സ്കൂൾ സമയം എട്ടുമുതൽ ഒരുമണി വരെയാക്കണം, ആരാധനയ്ക്കും വിശ്വാസത്തിനും സ്വാതന്ത്ര്യം, സാമൂഹ്യനീതി ജാതി സെൻസസിലൂടെ തുടങ്ങിയവയാണ് രേഖയിലെ സുപ്രധാന കാര്യങ്ങൾ

നയരേഖയിൽ സൂചിപ്പിച്ച മറ്റുകാര്യങ്ങൾ:

∙ വിദ്യാഭ്യാസ വായ്പ ബാധ്യതകൾ എഴുതിത്തള്ളണം

∙ സംരംഭക സംരക്ഷണ നിയമം അടിയന്തരമായി നടപ്പാക്കണം

∙ തിരികെയെത്തുന്ന പ്രവാസികൾക്കായി പദ്ധതികൾ ആരംഭിക്കും

∙ വിദ്യാഭ്യാസം സൗജന്യമാക്കണം

∙ മേക്ക് ഇൻ കേരള പദ്ധതി ജനകീയമാക്കണം

∙ വഴിയോര കച്ചവടക്കാർക്ക് കച്ചവട സൗഹൃദ വായ്പ നടപ്പാക്കണം

∙ തൊഴിലില്ലായ്മ വേതനം മിനിമം 2000 രൂപയാക്കണം

∙ അഭ്യസ്തവിദ്യരായ തൊഴിൽ രഹിതർക്ക് കെഎസ്ആർ‌ടിസി സൗജന്യ യാത്ര പാസ് 

∙ വയോജന ക്ഷേമ നയം നടപ്പാക്കണം

∙ വയോജന വകുപ്പ് രൂപീകരിക്കണം

∙ തീരദേശ അവകാശ നിയമം പാസാക്കണം

∙ പ്രത്യേക കാർഷിക ബജറ്റ് അവതരിപ്പിക്കണം

∙ നിയോജക മണ്ഡലങ്ങളിൽ കൃഷിക്കായി പ്രത്യേക സോൺ

∙ പഞ്ചായത്ത് തോറും കാലാവസ്ഥ പഠന കേന്ദ്രം

∙ റബറിനെ കാർഷിക വിളയായി പ്രഖ്യാപിക്കണം

∙ തോട്ടം പ്ലാന്റേഷനുകളിൽ ആരോഗ്യ–ഫാം ടൂറിസത്തിനായി നിയമഭേദഗതി

∙ ഓൺലൈൻ കച്ചവടം നിരുത്സാഹപ്പെടുത്തണം

∙ വന്യമൃഗ ആക്രമണത്തിന്റെ നഷ്ട പരിഹാരം 50 ലക്ഷമാക്കണം

∙ സഹകരണ സംഘങ്ങളിൽ ‍പാർട്ടി നിയമനങ്ങൾ അവസാനിപ്പിക്കും.

∙ ലഹരിക്കെതിരെ ഗ്രാമതലത്തിൽ അധികാരമുള്ള ജനകീയ സംവിധാനം

∙ 2 എഫ്ഐആറുകളിൽ ഉൾപ്പെട്ട പൊലീസ് ഉദ്യോഗസ്ഥരെ തൽസ്ഥാനത്ത് നിന്നും മാറ്റണം

∙ അസ്വാഭാവികമല്ലാത്ത അപകട മരണങ്ങളിൽ കുടുംബം ആവശ്യപ്പെട്ടാൽ പോസ്റ്റ്‌മോർട്ടം നടപടികൾ ഒഴിവാക്കണം

∙ ശബരിമലയുടെയും വഖഫ് ബോർഡിന്റെയും ഭരണം അതാത് മതവിശ്വാസികൾ അല്ലാത്തവർ നിയന്ത്രിക്കുന്നതിൽ അടിയന്തര മാറ്റം വേണം

• ∙ കായിക സർവകലാശാല നടപ്പിലാക്കണം

മുസ്ലീം ലീ​ഗ് എറണാകുളം ജില്ലാ മുൻ പ്രസിഡന്റ് ഹംസ പറക്കാട്ടും വേദിയിലുണ്ടായിരുന്നു.