Ignorance of workers in KPPL; R Chandrasekharan says Congress and INTUC will take up workers' strike.

വൈക്കം: കേരളാ സർക്കാർ സ്ഥാപനമായ കെ പി പിഎല്ലിൽ ജോലി ചെയ്യുന്ന എച്ച് എൻ എല്ലിലെ മുൻ ജീവനക്കാർ ഉൾപ്പടെയുള്ള തൊഴിലാളികളോടുള്ള അവഗണനയും മാനേജ്മെൻ്റിൻ്റെ തൊഴിലാളി വിരുദ്ധനിലപാടും അവസാനിപ്പിച്ചില്ലെങ്കിൽ കോൺഗ്രസ്സും ഐഎൻടിയുസിയും തൊഴിലാളി സമരം ഏറ്റെടുക്കുമെന്ന് ഐഎൻടിയുസി സംസ്ഥാന പ്രസിഡൻ്റ് ആർ.ചന്ദ്രശേഖരൻ പറഞ്ഞു.

സംസ്ഥന സർക്കാരിൻ്റെ അവഗണനക്കെതിരെയും മാനേജ്മെൻ്റിൻ്റെ തൊഴിലാളി വിരുദ്ധ നിലപാടുകൾക്കെതിരെയും കെ പി പി എൽ ഐ എൻ ടി യു സി യൂണിയൻ്റെ നേതൃത്വത്തിൽ കെ പി പിഎല്ലിന് മുന്നിൽ നടത്തിയ ഏകദിന ഉപവാസ സമരം ഉദ്ഘാടനം ചെയ്യുകയായിരുന്നു അദ്ദേഹം. കമ്പനി മെയിൻ ഗേയ്റ്റിന് മുന്നിൽ നടന്ന ഉപവാസ സമരത്തിൽ വർക്കേഴ്സ് അസ്സോസിയേഷൻ ഐഎൻടിയുസി ജനറൽ സെക്രട്ടറി കെ.പി ജോസ് അധ്യക്ഷത വഹിച്ചു. തലയോലപ്പറമ്പ് ബ്ലോക്ക് കോൺഗ്രസ് പ്രസിഡൻ്റ് എം.കെ ഷിബു മുഖ്യ പ്രഭാഷണം നടത്തി. ഐ എൻ ടി യു സി സംസ്ഥാന സെക്രട്ടറിമാരായ എം.വി മനോജ്, പി.വി പ്രസാദ്, ജില്ലാ സെക്രട്ടറി ഇടവട്ടം ജയകുമാർ, കടുത്തുരുത്തി റീജിയണൽ പ്രസിഡൻ്റ് എം.എൻ ദിവാകരൻ നായർ, ഭാരവാഹികളായ എസ്.എസ് മുരളി, വി.ടി ജെയിംസ്, പി.എസ് ബാബു, കോൺഗ്രസ് മണ്ഡലം പ്രസിഡൻ്റ് വി.സി ജോഷി, എംപ്ലോയീസ് അസ്സോസിയേഷൻ ജനറൽ സെക്രട്ടറി സുജിത്ത് സുരേന്ദ്രൻ, വൈസ് പ്രസിഡൻ്റ് അജിത് കുമാർ തുടങ്ങിയവർ പ്രസംഗിച്ചു. വനിതാ തൊഴിലാളികൾ അടക്കം നിരവധി പേർ സത്യാഗ്രഹ സമരത്തിൽ പങ്കെടുത്തു. എച്ച് എൻ എല്ലിലെ മുൻ ജീവനക്കാരെ മുൻ കാല പ്രാബല്യത്തോടെ സ്ഥിര നിയമനം നൽകുക, കാഷ്വൽ-കോൺട്രാക്ട് തൊഴിലാളികളുടെ സേവന - വേതന കരാർ പുതുക്കി നിശ്ചയിക്കുക, ജീവനക്കാരുടേയും തൊഴിലാളികളുടേയും ഇ എസ് ഐ, പി.എഫ്, ഗ്രാറ്റുവിറ്റി തുടങ്ങിയ സാമൂഹ്യ സുരക്ഷ ഉറപ്പാക്കുക, കാൻ്റീൻ സൗകര്യം ഏർപ്പെടുത്തുക, തസ്തിക പുനർവിന്യാസം നടപ്പിലാക്കുക തുടങ്ങി വിവിധ ആവശ്യങ്ങൾ ഉന്നയിച്ച് രാവിലെ 9 മുതൽ വൈകിട്ട് 5 വരെയാണ് ഉപവാസ സമരം സംഘടിപ്പിച്ചത്.

Tags:

കെ പി പിഎല്ലിലെ തൊഴിലാളികളോടുള്ള അവഗണന; കോൺഗ്രസ്സും ഐഎൻടിയുസിയും തൊഴിലാളി സമരം ഏറ്റെടുക്കുമെന്ന് ആർ.ചന്ദ്രശേഖരൻ.

More in Related News