Rahul resigns as Youth Congress president at Mankoottam

കോട്ടയം: വിവാദങ്ങൾക്ക് പിന്നാലെ യൂത്ത് കോൺഗ്രസ് അധ്യക്ഷ സ്ഥാനം രാജി വച്ച് രാഹുൽ മാങ്കൂട്ടം എം.എൽ.എ. യുവനടിക്ക് അശ്ലീല സന്ദേശമയച്ച വിഷയത്തിൽ ഉയർന്ന വിവാദങ്ങളെ തുടർന്ന് ആണ് രാജി. വിഷയത്തിൽ ധാർമികതയുടെ പുറത്താണ് രാജിവെക്കുന്നതെന്ന് രാഹുൽ വ്യക്തമാക്കി. രാജി വയ്ക്കുന്നത് ഞാൻ കുറ്റം ചെയ്തത് കൊണ്ടല്ലെന്നും മറിച്ച് തന്റെ പ്രവർത്തകർ എന്നെ ന്യായീകരിക്കേണ്ടതില്ല എന്ന് കരുതിയുമാണ് താൻ രാജിവയ്ക്കുന്നതെന്നും രാഹുൽ മാങ്കൂട്ടത്തിൽ വാർത്താസമ്മേളനത്തിൽ അറിയിച്ചു. തന്നോട് രാജി വയ്ക്കണമെന്ന് ആരും ആവശ്യപ്പെട്ടിട്ടില്ല. പാർട്ടിയിലെ ഒരാളും ഈ ആവശ്യം ഉന്നയിച്ചിട്ടില്ല. രാജി വയ്ക്കുന്ന നിമിഷം വരെ തനിക്ക് എതിരെ ഒരു എഫ്.ഐ.ആർ പോലും രജിസ്റ്റർ ചെയ്തിട്ടില്ലെന്നും രാഹുൽ പ്രതികരിച്ചു. അടൂരിലെ വീട്ടിൽ നടത്തിയ വാർത്താസമ്മേളനത്തിലാണ് രാജി പ്രഖ്യാപിച്ചത്. പാർട്ടി പ്രവർത്തകർ സർക്കാരിനെതിരായി നിലപാടെടുക്കുന്ന സമയത്ത് ഇത്തരം വിഷയങ്ങളിൽ ന്യായീകരിക്കേണ്ടി വരുന്ന പ്രതിസന്ധി സൃഷ്ടിക്കുന്നില്ല. അതുകൊണ്ട് രാജിവെക്കുകയാണ്. കുറ്റം ചെയ്തതുകൊണ്ടല്ല രാജിവെക്കുന്നതെന്നും രാഹുൽ കൂട്ടിച്ചേർത്തു.

രാഹുൽ മാങ്കൂട്ടത്തിലിനെതിരെ ഉയർന്ന ആരോപണങ്ങളിൽ അദ്ദേഹം മറുപടി പറയണമെന്ന് പാർട്ടിയിൽ ആവശ്യം ഉയർന്നിരുന്നു. ആരോപണങ്ങളുടെ പശ്ചാത്തലത്തിൽ രാഹുൽ യൂത്ത് കോൺഗ്രസ് സംസ്ഥാന അധ്യക്ഷസ്ഥാനത്തുനിന്ന് മാറിനിൽക്കണമെന്ന ആവശ്യവും ശക്തമായിരുന്നു.