ബോളിവുഡ് അനുരാഗിനെ അര്‍ഹിക്കുന്നില്ല.. ബോളിവുഡിനെ ഉപേക്ഷിച്ച് സൗത്തിന്ത്യന്‍ സിനിമകളിലേക്ക്...അനുരാഗ് കശ്യപെന്ന ലെജന്‍ഡ് ലക്ഷ്യം വെക്കുന്നതെന്ത്?

ദക്ഷിണേന്ത്യന്‍ സിനിമകളോടുള്ള ഇഷ്ടം പലപ്പോഴും തുറന്നുപറഞ്ഞിട്ടുള്ള സംവിധായകനാണ് അനുരാഗ് കശ്യപ്. ബോളിവുഡിന് ദക്ഷിണേന്ത്യന്‍ സിനിമകള്‍ അലര്‍ജിയായിരിക്കുമ്പോഴും ആ നിലപാടിന് ഒരു മാറ്റവുമുണ്ടായിട്ടില്ല. മഹാരാജ, റൈഫിള്‍ ക്ലബ് തുടങ്ങിയ ചിത്രങ്ങളിലൂടെ തമിഴിലും മലയാളത്തിലും സജീവമായ നടനാണ്് അനുരാഗ്. ഹിന്ദി സിനിമാ മേഖലയിലെ ഇപ്പോഴത്തെ അവസ്ഥയോട് തനിക്ക് വെറുപ്പാണെന്നും ഒരു മാറ്റത്തിനായി ദക്ഷിണേന്ത്യയിലേക്ക് മാറാന്‍ പദ്ധതിയുണ്ടെന്നും ദ ഹോളിവുഡ് റിപ്പോര്‍ട്ടര്‍ ഇന്ത്യക്ക് നല്‍കിയ അഭിമുഖത്തില്‍ പറഞ്ഞു. മികച്ച നടന്മാരെയും നല്ല സിനിമകളെയും സൃഷ്ടിക്കുന്നതിന് പകരം താരങ്ങളെ ഉണ്ടാക്കാനാണ് ബോളിവുഡ് കൂടുതലും ശ്രമിക്കുന്നതെന്നും അനുരാഗ് വിമര്‍ശിച്ചു. ഒരു അഭിനേതാവിന്റെ കഴിവുകള്‍ ഉയര്‍ത്തിക്കാട്ടുന്നതിന് പകരം താരങ്ങളായി മാറ്റാനാണ് ടാലന്റ് ഹണ്ട് ഏജന്‍സികള്‍ ശ്രമിക്കുന്നത്. ''ഇപ്പോള്‍ പുറത്തുപോയി പരീക്ഷണം നടത്തുന്നത് എനിക്ക് ബുദ്ധിമുട്ടാണ്, ഇത് ചിലവിലാണ്, ഇത് എന്റെ നിര്‍മ്മാതാക്കളെ ലാഭത്തെയും മാര്‍ജിനുകളെയും കുറിച്ച് ചിന്തിക്കാന്‍ പ്രേരിപ്പിക്കുന്നു. ആദ്യം മുതല്‍, സിനിമ ആരംഭിക്കുന്നതിന് മുമ്പ്, അത് എങ്ങനെ വില്‍ക്കാം എന്നതിനെക്കുറിച്ചാണ്. അങ്ങനെ സിനിമാനിര്‍മ്മാണത്തിന്റെ സന്തോഷം ചോര്‍ന്നുപോയി. അതുകൊണ്ടാണ് അടുത്ത വര്‍ഷം മുംബൈയില്‍ നിന്ന് മാറാന്‍ ഞാന്‍ ആഗ്രഹിക്കുന്നത്. 

ഞാന്‍ ദക്ഷിണേന്ത്യയിലേക്ക് പോകുന്നു. എന്റെ സ്വന്തം സിനിമാ വ്യവസായത്തില്‍ ഞാന്‍ വളരെ നിരാശയും വെറുപ്പും അനുഭവിക്കുന്നു. ചിന്താഗതിയില്‍ എനിക്ക് വെറുപ്പാണ്'' സംവിധായകന്‍ വ്യക്തമാക്കി. പുതുമയുള്ളതും പരീക്ഷണാത്മകവുമായ ആഖ്യാനങ്ങള്‍ പ്രദര്‍ശിപ്പിക്കുന്ന മഞ്ഞുമ്മേല്‍ ബോയ്‌സ് പോലുള്ള സിനിമകള്‍ ഒരിക്കലും ബോളിവുഡില്‍ നിന്നുണ്ടാകുന്നില്ലെന്നും വിജയിച്ചാല്‍ പകരം റീമേക്ക് ചെയ്യുമെന്നും അദ്ദേഹം ചൂണ്ടിക്കാട്ടി. ''ഇതിനകം ഹിറ്റായ സിനിമകളെ റീമേക്ക് ചെയ്യുക എന്നതാണ് രീതി. അവര്‍ പുതിയതൊന്നും പരീക്ഷിക്കില്ല. ആദ്യ തലമുറയിലെ അഭിനേതാക്കളും യഥാര്‍ഥത്തില്‍ അര്‍ഹതയുള്ളവരും കൈകാര്യം ചെയ്യുന്നത് വളരെ വേദനാജനകമാണ്. ആരും അഭിനയിക്കാന്‍ ആഗ്രഹിക്കുന്നില്ല - അവരെല്ലാം താരങ്ങളാകാന്‍ ആഗ്രഹിക്കുന്നു.ഏജന്‍സി ചെയ്യുന്നത് ഇതാണ് - അവര്‍ നിങ്ങളില്‍ നിന്ന് പണം സമ്പാദിക്കുന്നു. പുതിയ കരിയര്‍ കെട്ടിപ്പടുക്കാന്‍ അവര്‍ നിക്ഷേപിച്ചിട്ടില്ല. 

പുതിയ അഭിനേതാക്കള്‍ വളരാന്‍ അവര്‍ ആഗ്രഹിക്കുന്നില്ല. അഭിനയ വര്‍ക്ക്ഷോപ്പുകളിലേക്ക് അയക്കുന്നതിന് പകരം ജിമ്മുകളിലേക്ക് അയക്കും'' അദ്ദേഹം പറഞ്ഞു. അഭിനേതാക്കളും സിനിമാ നിര്‍മാതാക്കളും തമ്മിലുള്ള ഒരു മതിലായി ഏജന്‍സികള്‍ മാറിയെന്നും കശ്യപ് കൂട്ടിച്ചേര്‍ത്തു.ഒരിക്കല്‍ സുഹൃത്തുക്കളായി കരുതിയ അഭിനേതാക്കളില്‍ അദ്ദേഹം നിരാശ പ്രകടിപ്പിച്ചു. ''സുഹൃത്തുക്കളായി ഞാന്‍ കരുതിയ എന്റെ ഒരു അഭിനേതാവ്, അവര്‍ ഒരു പ്രത്യേക രീതിയില്‍ ആയിരിക്കാന്‍ ആഗ്രഹിക്കുന്നതിനാല്‍ നിങ്ങളെ പ്രേരിപ്പിക്കുന്നു. അതാണ് ഇവിടെ കൂടുതലും സംഭവിക്കുന്നത്. മലയാള സിനിമയില്‍ അത് സംഭവിക്കുന്നില്ല'' ദക്ഷിണേന്ത്യന്‍ സിനിമയുടെ സഹകരണ മനോഭാവത്തെ പ്രശംസിച്ചുകൊണ്ട് അദ്ദേഹം പറഞ്ഞു. 

തുടര്‍ച്ചയായി രണ്ട് തവണ ഓസ്‌കാര്‍ ജേതാവായ ഹോളിവുഡ് സംവിധായകന്‍ അലജാന്‍ഡ്രോ ഗോണ്‍സാലസ് ഇനാരിതു അനുരാഗ് കശ്യപിന് തന്റെ അടുത്ത സിനിമയില്‍ ഒരു വേഷം വാഗ്ദാനം ചെയ്തുവെന്ന് സംവിധായകന്‍ നിതിലന്‍ സ്വാമിനാഥന്‍ . ചെന്നൈയില്‍ നടന്ന ഗലാട്ട നക്ഷത്ര അവാര്‍ഡ് ദാന ചടങ്ങിലാണ് നിതിലന്‍ ഇതേക്കുറിച്ച് സംസാരിച്ചത്. ഇനരിറ്റു 'മഹാരാജ' എന്ന തമിഴ് ചിത്രം കണ്ടിട്ടാണ് വില്ലന്‍ കഥാപാത്രമായ അനുരാഗ് കശ്യപിന് തന്റെ അടുത്ത സിനിമയില്‍ ഒരു വേഷം വാഗ്ദാനം ചെയ്തിരിക്കുന്നത്. ഇതിനെപറ്റി നിതിലന്‍ സംസാരിക്കുന്ന വീഡിയോ സോഷ്യല്‍ മീഡിയയില്‍ വൈറലാകുകയാണ്. അടുത്തിടെ അനുരാഗ് കശ്യപ് ബോളിവുഡുമായുള്ള തന്റെ നിരാശ പ്രകടിപ്പിക്കുകയും ജോലിക്കായി കേരളത്തിലേക്ക് പോകുകയാണെന്ന് പറയുകയും ചെയ്തിരുന്നു. ആഷിക് അബു സംവിധാനം ചെയ്ത ഏറ്റവും പുതിയ മലയാള ചിത്രം റൈഫിള്‍ ക്ലബില്‍ വില്ലനായി എത്തി അനുരാഗ് കശ്യപ് ഏറെ ശ്രദ്ധ നേടി. കെന്നഡി ആയിരുന്നു അദ്ദേഹത്തിന്റെ അവസാന ഫീച്ചര്‍ ഫിലിം, ഇന്ത്യയില്‍ ഇതുവരെ ചിത്രം തിയേറ്ററില്‍ റിലീസ് ചെയ്യാനായിട്ടില്ല.