A 24-year-old man has been sentenced to 39 years rigorous imprisonment and a fine of Rs 2,40,000 for sexually assaulting a 16-year-old girl.

ചാവക്കാട്:16 വയസ്സ് പ്രായമുള്ള പെൺകുട്ടിയെ ലൈംഗിക പീഡനത്തിന് ഇരയാക്കിയ കേസിൽ 24 വയസ്സുകാരന് 39 വർഷം കഠിനതടവും 2,40,000 രൂപ പിഴയും ശിക്ഷ വിധിച്ചു.പിഴ അടക്കാത്ത പക്ഷം 21 മാസം കൂടി അധിക തടവ് അനുഭവിക്കണം.പ്രതിയിൽ നിന്നും പിഴ ഈടാക്കുന്ന പക്ഷം പിഴത്തുക അതിജീവിതക്ക് നൽകാനും കോടതി വിധിച്ചു.മതിലകം മാങ്ങാലി പറമ്പിൽ നൗഷാദ് മകൻ റിൻഷാദ്(24)നെയാണ് ചാവക്കാട് അതിവേഗ സ്പെഷ്യൽ കോടതി ജഡ്ജി അന്യാസ് തയ്യിൽ കുറ്റക്കാരനാണെന്ന് കണ്ടെത്തി ശിക്ഷ വിധിച്ചത്.2022 ഡിസംബർ 14 -നാണ് കേസിനാസ്പദമായ ലൈംഗീക പീഡനം നടന്നത്.2022 സെപ്റ്റംബർ 21 മുതൽ ഇൻസ്റ്റഗ്രാമിലേക്ക് മോശം മെസ്സേജുകൾ അയച്ചും നിരന്തരം നിർബന്ധിച്ചുമാണ് പ്രതി അതിജീവിതയെ അർദ്ധരാത്രി താമസസ്ഥലത്ത് നിന്നും പുറത്തേക്കുവരുത്തിച്ച് ലൈംഗിക പീഡനം നടത്തിയത്.ചാവക്കാട് പോലീസ് സ്റ്റേഷനിൽ വിവരം അറിയിച്ചതിനെ തുടർന്ന് സിപിഒ പ്രസീത അതിജീവിതയുടെ മൊഴി രേഖപ്പെടുത്തി ഹാജരാക്കിയതിൻ്റെ അടിസ്ഥാനത്തിൽ എസ്ഐ പി.എസ്.അനിൽകുമാർ എഫ്ഐആർ രജിസ്റ്റർ ചെയ്ത കേസിൽ എസ്ഐ സെസിൽ ക്രിസ്റ്റ്യൻ രാജ് ആദ്യന്വേഷണം നടത്തി.എസ്എച്ച്ഒ വിപിൻ കെ.വേണുഗോപാൽ തുടരന്വേഷണം നടത്തി പ്രതിക്കെതിരെ കുറ്റപത്രം സമർപ്പിച്ചു.കേസിൽ പ്രോസിക്യൂഷൻ ഭാഗത്ത് നിന്നും 16 സാക്ഷികളെ വിസ്തരിക്കുകയും,29 രേഖകൾ ഹാജരാക്കുകയും ചെയ്തു.പ്രോസിക്യൂഷന് വേണ്ടി സ്പെഷ്യൽ പബ്ലിക് പ്രോസിക്യൂട്ടർ സിജു മുട്ടത്ത്,അഡ്വ.സി.നിഷ എന്നിവർ ഹാജരായി.സിപിഒമാരായ സിന്ധു,പ്രസീത എന്നിവർ കോടതി നടപടികൾ ഏകോപിപ്പിക്കുന്നതിനായി പ്രോസിക്യൂഷനെ സഹായിച്ചു.