തിരുവനന്തപുരം : കെ എസ് ആർ ടി സി വിദ്യാർത്ഥികൺസഷൻ ഓൺലൈനിൽ നൽകുന്ന പദ്ധതി വിജയകരമായി നടന്ന് വരികയാണ്. എന്നാൽ ചില വിദ്യാഭ്യാസ സ്ഥാപനങ്ങളിലേക്ക് വിദ്യാർത്ഥികൾ  അയക്കുന്ന അപേക്ഷകളിൽ ശരിയായ രീതിയിൽ സ്ഥാപനത്തിൻ്റെ രജിസ്ട്രേഷൻ നടപടികൾ നടക്കാതിരുന്നതിനാലും അവബോധ കുറവിനാലും അപ്രൂവ് ചെയ്യാനാകാതെ കെട്ടിക്കിടക്കുന്നുണ്ട്. അതുകാരണം ഒരു വിഭാഗം വിദ്യാർത്ഥികൾക്ക് കൃത്യമായ അറിയിപ്പ് ലഭ്യമാകാതെയും കൺസഷൻ ലഭിക്കുന്നതിന് ബുദ്ധിമുട്ടുണ്ടാകുന്നതായി ശ്രദ്ധയിൽ പെട്ടിട്ടുണ്ടെന്ന് കെ എസ് ആർ ടി സി - സി എം ഡി .

ഇക്കാരണത്താൽ വിദ്യാർത്ഥികൾക്ക് ഉണ്ടാകുന്ന ബുദ്ധിമുട്ടുകൾ പരിഹരിക്കുന്നതിന് അടിയന്തിര പരിഹാരം എത്രയും വേഗം ഉണ്ടാക്കുന്നതിന്  വിദ്യാർത്ഥികളുടെ അപേക്ഷ നേരിട്ട് KSRTC യിലേക്ക് ലഭിക്കുന്ന രീതിയിൽ സംവിധാനം പുനക്രമീകരിച്ച് വിദ്യാഭ്യാസ സ്ഥാപനത്തിൽ നിന്നും അപ്രൂവൽ ലഭിക്കാത്ത വിദ്യാർത്ഥികളുടെ പ്രശ്നം കൂടി പരിഹരിച്ചിട്ടുണ്ട്. 

ഇത്തരത്തിൽ ഉണ്ടായിട്ടുള്ള ബുദ്ധിമുട്ട് പരിഹരിക്കപ്പെട്ട വിദ്യാർത്ഥികൾ  ഇതോടൊപ്പം ഉള്ളടക്കം ചെയ്തിട്ടുള്ള ഫോം - 1 മുൻപ് സ്ഥാപനങ്ങൾ നേരിട്ട് ചെയ്തിരുന്നത് പോലെ തന്നെ വിദ്യാർത്ഥികൾക്ക് വിദ്യാഭ്യാസസ്ഥാപനത്തിൽ നിന്നും സർട്ടിഫൈ ചെയ്ത് ലഭ്യമാക്കേണ്ടതാണ്. ഇത് വിദ്യാർത്ഥികൾ കൺസഷൻ കാർഡ് വാങ്ങുവാൻ വരുമ്പോൾ ഫോട്ടോയോടൊപ്പം കൊണ്ടുവന്നാൽ മതിയാകും.

 പുതിയതായി ഓൺലൈൻ വഴി അപേക്ഷിക്കുമ്പോൾ വിദ്യാർത്ഥികൾ പ്രസ്തുത ഫോം കൂടി അപ്‌ലോഡ് ചെയ്യുന്നതിന് സൗകര്യം ഉണ്ടായിരിക്കുന്നതാണ്. ഇത്തരത്തിൽ മാറ്റം വരുത്തുന്നതോടെ നിലവിൽ ഓൺലൈൻ കൺസഷനുമായി ബന്ധപ്പെട്ട എല്ലാ കാലതാമസവും ഒഴിവാകുന്നതാണ്.

അപൂർവ്വം ചില കമ്പ്യൂട്ടർ സെൻ്ററുകൾ മുഖാന്തിരം അപേക്ഷിച്ചപ്പോൾ ടി സ്ഥാപനങ്ങൾ താത്ക്കാലികമായി സ്വന്തം നിലയിൽ ഫോൺ നമ്പരും ഇമെയിൽ വിലാസവും വിദ്യാർത്ഥികൾക്കായി ഉണ്ടാക്കിയ ശേഷം ഐഡിയും പാസ്വേഡും വിദ്യാർത്ഥികൾക്കും വിദ്യാഭ്യാസ സ്ഥാപനങ്ങൾക്കും ലഭ്യമാകാത്തതായും  കണ്ടെത്തിയിട്ടുണ്ട്. ഇത് വിദ്യാർത്ഥികൾക്കുള്ള കൺഫർമേഷൻ മെസേജുകൾ ലഭ്യമാകാത്ത സാഹചര്യം സൃഷ്ടിക്കുകയും അപേക്ഷകൾ കൃത്യമായി സ്ഥാപനങ്ങളിൽ എത്താതെ വരികയും  ചെയ്യുന്നതിന് കാരണമായിട്ടുണ്ട്. കൂടാതെ വിദ്യാർത്ഥികളിൽ നിന്നും അപൂർവ്വം ചില കമ്പ്യൂട്ടർ സെൻ്ററുകൾ അമിത ചാർജ് ഈടാക്കുന്നതായും വരുമാന സർട്ടിഫിക്കറ്റ് പോലെ അനാവശ്യ രേഖകൾ ആവശ്യപ്പെടുന്നതായും മനസ്സിലാക്കുന്നു. 

തെറ്റിധാരണകൾ ഒഴിവാക്കുന്നതിനായി അവശ്യമായ രേഖകൾ ഇതോടൊപ്പം ഒരിക്കൽ കൂടി ഉള്ളടക്കം ചെയ്തിട്ടുണ്ട്. വിവരങ്ങൾ ലിങ്കിൽ https://bit.ly/3z3YOpG ക്ലിക്ക് ചെയ്ത്  അല്ലെങ്കിൽ KSRTC യുടെ ഒഫീഷ്യൽ സൈറ്റിൽ (https://www.keralartc.com/) 

കൺസെഷൻ പോർട്ടലിൽ (https://concessionksrtc.com/) നിന്നോ മനസിലാക്കാവുന്നതാണ്.

 വിദ്യാർത്ഥികൾക്ക് സ്വന്തമായി മൊബൈൽ ആപ് വഴിയും (KSRTC CONCESSION) അപേക്ഷകൾ വളരെ എളുപ്പത്തിൽ അയക്കാവുനതാണ്.

 കൂടാതെ ആവശ്യമായ സംശയ നിവാരണത്തിനായി അടുത്തുള്ള കെഎസ്ആർടിസി ഡിപ്പോയുമായി ബന്ധപ്പെടാവുന്നതാണ്. നിലവിൽ ഓൺലൈൻ സംവിധാനം വന്നതോടു കൂടി KSRTC യിൽ വിദ്യാർത്ഥികൾ ക്യൂ നിൽക്കുന്ന സാഹചര്യവും അനുബന്ധ ബുദ്ധിമുട്ടുകളും കാലതാമസവും പൂർണ്ണമായും ഒഴിവായിട്ടുണ്ട്.

 മുൻവർഷങ്ങളേക്കാൾ വേഗത്തിൽ കൺസഷൻ വിതരണം ചെയ്യുന്നതിന് സംവിധാനമൊരുക്കുവാൻ യൂണിറ്റുകളിലും ചീഫ് ഓഫിസിലും ജീവനക്കാരും സൂപ്പർവൈസർമാരും ഓഫിസർമാരും രാവും പകലും പ്രയത്നിക്കുകയും തത്ഫലമായി ഓൺലൈനായുള്ള കൺസഷൻ വിതരണ സംവിധാനം വിജയകരമായി നടപ്പിലാക്കി വരികയാണ്. ഇതിന് പൊതു ജനങ്ങളുടെയും വിശിഷ്യാ വിദ്യാർത്ഥികളുടെയും അധ്യാപകരുടെയും സഹകരണം KSRTC CMD അഭ്യർത്ഥിച്ചു.

വിശദവിവരങ്ങൾക്ക് 

keralaconcession@gmail.com എന്ന ഈമെയിലിലോ Phone:0471-2463799,9447071021കസ്റ്റമർകെയർ ഫോൺ നമ്പരിലോ ബന്ധപ്പെടുക.