Vaikom city and nearby areas are severely besieged by street disturbances.

വൈക്കം: വൈക്കം നഗരത്തിലും സമീപ പ്രദേശങ്ങളിലും തെരുവുനായ ശല്യം രൂക്ഷം. പ്രദേശത്ത് തെരുവുനായയുടെ ആക്രമണത്തിൽ ഒരാൾക്ക് കടിയേറ്റു. വൈക്കം വടക്കേനട വല്ലൂർ മഠത്തിൽ വിജയനാണ് കഴിഞ്ഞ ദിവസം കടിയേറ്റത്. വിജയന്റെ വളർത്തുനായയെ തെരുവുനായ്ക്കൂട്ടം ആക്രമിക്കുന്നതു കണ്ട് ഓടിച്ചുവിടാൻ ശ്രമിക്കുന്നതിനിടെ ഓടിയടുത്ത ആക്രമണകാരിയായ നായ കയ്യിൽ കടിക്കുകയായിരുന്നു.

സാരമായി പരിക്കേറ്റ വിജയൻ കോട്ടയം മെഡിക്കൽ കോളേജ് ആശുപത്രിയിൽ ചികിത്സയിലാണ്. വൈക്കത്തും സമീപപ്രദേശങ്ങളിലും തെരുവുനായയുടെ ശല്യം രൂക്ഷമായിരിക്കുകയാണ്. വൈക്കം വലിയകവല, മഹാദേവ ക്ഷേത്രത്തിന്റെ തെക്കേനട, കിഴക്കേനട, വടക്കേനട, ബസ് സ്റ്റാൻഡ്, ലിങ്ക് റോഡ് എന്നിവിടങ്ങളിലാണ് തെരുവുനായ് ശല്യം രൂക്ഷമായിരിക്കുന്നത്. തലയോലപ്പറമ്പ് ,മറവൻതുരുത്ത്, വെച്ചൂർ പഞ്ചായത്തുകളുടെ വിവിധ മേഖലകളിലും അലഞ്ഞ് തിരിഞ്ഞ് നടക്കുന്ന തെരുവ് നായ്ക്കൾ പ്രദേശവാസികൾക്ക് ഏറെ ഭീതിയാണ് ഉളവാക്കുന്നത്.

ഇരുചക്രവാഹനത്തിൽ യാത്ര ചെയ്യുന്നവരുടെ നേരെ നായകൾ കൂട്ടമായി കുരച്ച് അടുക്കുന്നത് പലപ്പോഴും അപകടങ്ങൾക്കു കാരണമാകാറുണ്ട്. പുലർച്ചെ ക്ഷേത്രത്തിൽ ദർശനത്തിനു പതിവായി പോകുന്നവർക്കും ശല്യമുണ്ട്. സ്കൂൾ കുട്ടികൾ ഉൾപ്പെടെ ഒട്ടേറെ ആളുകൾ യാത്രചെയ്യുന്ന റോഡിൽ നായയുടെ ശല്യം രൂക്ഷമായിട്ടും അധികൃതർ കാര്യമായ നടപടികൾ സ്വീകരിക്കുന്നില്ലെന്നു പ്രദേശവാസികൾ ആരോപിച്ചു.

വർധിച്ചുവരുന്ന തെരുവുനായശല്യം പരിഹരിക്കാൻ അധികൃതർ അടിയന്തര നടപടി സ്വീകരിക്കണം എന്നതാണ് നാട്ടുകാരുടെ ആവശ്യം.