വൈക്കം: വൈക്കത്തഷ്ടമിയുടെ മുന്നോടിയായി വിവിധ സമൂഹങ്ങൾ ക്ഷേത്രത്തിൽ നടത്തി വരുന്ന സന്ധ്യ വേലയുടെ ഒരുക്കങ്ങൾ ആരംഭിച്ചു. 

നവംബർ 7 ന് വൈക്കം സമൂഹവും 9 ന് തെലുങ്ക് സമൂഹം 10 ന് തമിഴ് വിശ്വബ്രഹ്മസമാജം 11 ന് വടയാർ സമൂഹവുമാണ് സന്ധ്യ വേല നടത്തുന്നത്. വൈക്കം സമൂഹത്തിന്റെ സന്ധ്യ വേലയുടെയാണ് സമൂഹ സന്ധ്യ വേല ആരംഭിക്കുന്നത്. സന്ധ്യ വേല നാളിൽ രാവിലെ 7.30 നും വൈകിട്ട് 7.30 നും ആനപ്പുറത്ത് എഴുന്നള്ളിപ്പ് നടക്കും. വൈകിട്ട് ദീപാരധനക്ക് ശേഷമാണ് ഒറ്റപ്പണം സമർപ്പണം. ബലിക്കൽ പുരയിൽ വെള്ളപ്പട്ടു വിരിച്ച് സമൂഹം സെക്രട്ടറി കെ. സി. കൃഷ്ണമൂർത്തി ഒറ്റപ്പണ സമർപ്പണത്തിന് സമൂഹത്തിന്റെ ആദ്യ അംഗമെന്ന നിലയിൽ വൈക്കത്തു പെരും തൃക്കോവിലപ്പൻ, ഉദയനാപുരത്തപ്പൻ, തന്ത്രി കിഴക്കിനേടത്ത് മേക്കാട്ട് ഇല്ലം, തന്ത്രി ഭദ്രകാളി മറ്റപ്പള്ളി ഇല്ലം മേൽശാന്തി തരണി ഇല്ലം ,കിഴ്ശാന്തി മാർ ,പടിഞ്ഞാറെടത്ത് ഇല്ലത്ത് മൂസത് , കിഴക്കേടത്ത് മൂസത് , പട്ടോലക്കാർ, കിഴിക്കാർ എന്നിവരെ പേരു വിളിച്ച് ഒറ്റപ്പണ സമർപ്പണത്തിനായി ക്ഷണിക്കും.സമർപ്പിച്ച പണം കിഴിയാക്കി തല ചുമടായി എടുത്ത് വേദമന്ത്രോച്ചാരണങ്ങളോടെ ക്ഷേത്രത്തിന് ഒരു പ്രദക്ഷിണം വച്ച് കിഴി പണം എണ്ണി തിട്ടപ്പെടുത്തി ദേവസ്വത്തിന് കൈമാറും . പിന്നിട് ആ കിഴി പണത്തിൽ നിന്നു ഒരു പണം എടുത്ത് കീഴിയായി സൂക്ഷിക്കും ഇത് അടുത്ത സന്ധ്യ വേലയുടെ പ്രാരംഭ ചടങ്ങുകൾക്ക് ഉപയോഗിക്കും. 

സന്ധ്യ വേലയുടെ ഭാഗമായി നവംബർ 6 ന് വൈകിട്ട് വൈക്കം ക്ഷേത്രത്തിലും സമൂഹത്തിലും നിറപറ അളക്കുന്ന ചടങ്ങും നടക്കും. സമൂഹത്തിൽ അചാരപ്രകാരം ഒറ്റപ്പണ സമയത്ത് വിളിക്കുന്ന രീതിയിൽ ഒരോരുത്തരുടെയും പേര് വിളിച്ചാണ് നിറപറ നടത്തുന്നത്. നവംബർ 9 ന് തെലുങ്ക് സമൂഹത്തിന്റെ സന്ധ്യവേലയാണ്. അഷ്ടാഭിഷേകം, ധാരാ , വിശേഷാൽ വഴിപാടുകളും നടത്തും.

വൈക്കത്തഷ്ടമി മഹോൽസവത്തിന്റെ മുന്നോടിയായി വടയാർ സമൂഹം ക്ഷേത്രത്തിൽ നടത്തുന്ന സന്ധ്യ വേലയുടെ 

ഭാഗമായ ക്ഷേത്ര ദർശനം നവംബർ 3 ന് നടക്കും.വടയാർ സമൂഹത്തിന്റെ സന്ധ്യ വേലക്ക് മുമ്പായി സമൂഹവുമായി ബന്ധപ്പെട്ട വിവിധ ക്ഷേത്രങളിൽ സമൂഹത്തിന്റെ പ്രതിനിധികൾ ക്ഷേത്ര ദർശനം നടത്തി വിശേഷാൽ വഴിപാടുകൾ നടത്തുക പതിവ് ആചാരമാണ് . 

 മൂത്തേടത്ത് കാവ് ഭഗവതി ക്ഷേത്രം, തൃപ്പക്കുടം മഹാദേവ ക്ഷേത്രം, വാക്കയിൽ ശാസ്ത ക്ഷേത്രം, പുണ്ഡരിക പുരം മഹാവിഷ്ണു ക്ഷേത്രം, മറവൻതുരുത്ത് കൃഷ്ണൻ തൃക്കയിൽ ക്ഷേത്രം, ഉദയനാപുരം ക്ഷേത്രം, വൈക്കം ക്ഷേത്രം എന്നിവിടങ്ങളിലാണ് ദർശനം നടത്തുക . നവംബർ 11 നാണ് വടയാർ സമൂഹത്തിന്റെ സന്ധ്യ വേല .

 സന്ധ്യ വേല നാളിൽ ദീപാരാധനക്ക് ശേഷമാണ്  ഒറ്റപ്പണ സമർപ്പണം.