Padma Shri C.Sankaranarayanan Menon (Unni Gurus)First Commemorative Meeting Friday

ചാവക്കാട്:കളരിപയറ്റ് ആചാര്യനും,പത്മശ്രീ പുരസ്‌കാര ജേതാവുമായ ചുണ്ടയില്‍ ശങ്കരനാരായണമേനോന്റെ(ഉണ്ണി ഗുരുക്കള്‍) ഒന്നാം അനുസ്മരണയോഗം വെള്ളിയാഴ്ച്ച സംഘടിപ്പിക്കുമെന്ന് അനുസ്മരണ കമ്മിറ്റി ജനറല്‍ കണ്‍വീനര്‍ കെ.ടി.ബാലന്‍ വാർത്ത സമ്മേളനത്തില്‍ അറിയിച്ചു.ചാവക്കാട് വല്ലഭട്ട കളരി അങ്കണത്തില്‍ വൈകീട്ട് നാലിന് നടക്കുന്ന അനുസ്മരണയോഗം എന്‍.കെ.അക്ബര്‍ എംഎല്‍എ ഉദ്ഘാടനം ചെയ്യും.ഉണ്ണിഗുരുക്കളുടെ പത്‌നി സൗദാമിനി അമ്മ ഭദ്രദീപം തെളിയിക്കും.ചാവക്കാട് നഗരസഭ ചെയർപേഴ്സൺ ഷീജ പ്രശാന്ത് അധ്യക്ഷത വഹിക്കും.ചടങ്ങില്‍ ഉണ്ണിഗുരുക്കളുടെ പൂര്‍ണ്ണകായ ദാരുശില്പം അനാച്ഛാദനവും,മുഖ്യ അനുസ്മരണ പ്രഭാഷണവും പ്രശസ്ത കവിയും,സാഹിത്യക്കാരനുമായ രാധാകൃഷ്ണന്‍ മാസ്റ്റർ കാക്കശ്ശേരി നിര്‍വ്വഹിക്കും.ഉണ്ണി ഗുരുക്കളുടെ ഒന്നാം ചരമവാര്‍ഷിക ദിനാചരണത്തിന്റെ ഭാഗമായി കളരി അങ്കണത്തില്‍ രാവിലെ 10 മുതല്‍ ഉച്ചയ്ക്ക് ഒന്നുവരെ ഗുരുവായൂര്‍ അവധൂത് ആയുര്‍മഠത്തിന്റെ നേതൃത്വത്തില്‍ വിദഗ്ധരായ ഡോക്ടര്‍മാര്‍ നയിക്കുന്ന സൗജന്യ ആയുര്‍വേദ മെഡിക്കല്‍ ക്യാമ്പും,മരുന്നുവിതരണവും ഉണ്ടാവും.ചാവക്കാട് നഗരസഭ 17-ആം വാർഡ് കൗൺസിലർ എം.ബി.പ്രമീള ക്യാമ്പ് ഉദ്ഘാടനം ചെയ്യും.കളരിപ്പയറ്റിന് വേണ്ടി ജീവിതം തന്നെ മാറ്റിവെച്ച ചാവക്കാട് വല്ലഭട്ട കളരിയിലെ ഗുരുനാഥനായിരുന്ന ഉണ്ണിഗുരുക്കളെ 2022-ലാണ് രാജ്യം പത്മശ്രീ നല്‍കി ആദരിച്ചത്.ജില്ലാ സ്പോർട്സ് കൗൺസിൽ പ്രസിഡന്റ് കെ.ആർ.സാംബശിവൻ,ജില്ലാ കളരി അസോസിയേഷൻ പ്രസിഡന്റ് ഇ.ജി.സത്യപ്രകാശ്,അഡ്വ.മുള്ളത്ത് വേണുഗോപാൽ,ശശികുമാർ ചുണ്ടയിൽ എന്നിവർ സംബന്ധിക്കും.കളരിപ്പയറ്റ് അസോസിയേഷൻ സംസ്ഥാന പ്രസിഡന്റ് കെ.പി.കൃഷ്ണദാസ്,കെ.പി.രാജീവ്,കെ.പി.ദിനേശൻ,ലിനേഷ് പി.വേണുഗോപാല്‍,കെ.കെ.കൃഷ്ണപ്രതാപ് എന്നിവരും വാർത്താ സമ്മേളനത്തില്‍ പങ്കെടുത്തു.