Kerala Blasters to continue their winning streak in ISL

ഐഎസ്എല്ലില്‍ ജയം തുടരാന്‍ കേരള ബ്ലാസ്റ്റേഴ്‌സ് ഇന്നിറങ്ങും. രാത്രി ഏഴരയ്ക്ക് കൊച്ചിയില്‍ നടക്കുന്ന മത്സരത്തില്‍ നോര്‍ത്ത് ഈസ്റ്റ് യുണൈറ്റഡാണ് എതിരാളികള്‍. ഐഎസ്എല്‍ രണ്ടാം പാദത്തില്‍ തിരിച്ചുവരവിന്റെ പാതയിലാണ് കേരള ബ്ലാസ്റ്റേഴ്‌സ്. അവസാന നാല് കളിയില്‍ മൂന്നിലും ജയിച്ച കൊമ്പന്‍ന്മാരുടെ പ്ലേ ഓഫ് പ്രതീക്ഷകള്‍ വീണ്ടും സജീവമാണ്. കഴിഞ്ഞ കളിയില്‍ ഒഡീഷക്കെതിരെ പിന്നില്‍ പൊരുതിക്കയറിയായിരുന്നു ബ്ലാസ്റ്റേഴ്‌സിന്റെ തകര്‍പ്പന്‍ ജയം. 95ആം മിനിറ്റിലെ ഗോളില്‍ രണ്ടിനെതിരെ മൂന്ന് ഗോളിനായിരുന്നു കൊമ്പന്‍ന്മാര്‍ ജയിച്ചുകയറിയത്.

മുന്നേറ്റ നിരയുടെ മിന്നും ഫോം തന്നെയാണ് ബ്ലാസ്റ്റേഴ്‌സിന്റെ കരുത്ത്. ഹെസൂസ് ഹിമിനെ 10ഉം നോവ സദൂയി ഏഴും ക്വാമി പെപ്ര നാല് തവണയും ലക്ഷ്യം കണ്ടു. എന്നാല്‍ മധ്യനിരയിലെയും പ്രതിരോധത്തിലേയും പ്രശ്‌നങ്ങള്‍ക്ക് ഇപ്പോഴും പരിഹാരമായിട്ടില്ല.വ്യക്തി പിഴവുകള്‍ ആവര്‍ത്തിക്കുന്നു. നോര്‍ത്ത് ഈസ്റ്റ് യുണൈറ്റഡിനെതിരെ ഇതിന് പരിഹാരം കാണാന്‍ സാധിക്കുമെന്ന പ്രതീക്ഷയിലാണ് ടീമിന്റെ താല്‍കാലിക പരിശീലകനായ ടിജി പുരുഷോത്തമന്‍.

16 മത്സരങ്ങളില്‍ 6 ജയവും 8 തോല്‍വിയും രണ്ട് സമനിലയും ഉള്‍പ്പടെ 20 പോയിന്റുമായി 8ആം സ്ഥാനത്താണ് കേരള ബ്ലാസ്റ്റേഴ്‌സ്. ഇന്ന് ജയിക്കാനായാല്‍ ആറാം സ്ഥാനത്തേക്ക് മുന്നേറാനാകും. 24 പോയിന്റുള്ള നോര്‍ത്ത് ഈസ്റ്റ യുണൈറ്റഡ് അഞ്ചാം സ്ഥാനത്താണ്. ഐഎസ്എല്ലിലെ നേര്‍ക്കുനേര്‍ പോരില്‍ കേരള ബ്ലാസ്റ്റേഴ്‌സിനാണ് മുന്‍തൂക്കം. 23 മത്സരങ്ങളില്‍ 9 എണ്ണത്തില്‍ ബ്ലാസ്റ്റേഴ്‌സ് ജയിച്ചപ്പോള്‍ 6 എണ്ണത്തില്‍ ജയം നോര്‍ത്ത് ഈസ്റ്റിനൊപ്പമായിരുന്നു.