വൈക്കം: കൃഷി വകുപ്പ് ജീവനക്കാരാനും ജീവകാരുണ്യ പ്രവർത്തകനും സംഘാടകനുമായ വൈക്കം സ്വദേശി ഷിഹാബ് കെ സൈനു ഡോ.എ. പി. ജെ അബ്ദുൾകലാം സ്റ്റഡി സെന്റർ ഏർപ്പെടുത്തിയ കേരളീയം പുരസ്കാരം ഏറ്റുവാങ്ങി. മുന്‍ രാഷ്ട്രപതി ഡോ.എ. പി. ജെ അബ്ദുള്‍ കലാമിന്റെ സ്മരണാര്‍ത്ഥം രാജ്യത്താകമാനം പ്രവര്‍ത്തിക്കുന്ന സംഘടനയാണ് ഡോ. എ.പി.ജെ അബ്ദുള്‍ കലാം സ്റ്റഡി സെന്റര്‍. കേരളപ്പിറവിയോടനുബന്ധിച്ച് എല്ലാവര്‍ഷവും വിവിധ മേഖലയില്‍ മികവാര്‍ന്ന പ്രവര്‍ത്തനം നടത്തുന്ന പ്രതിഭകള്‍ക്കാണ് പുരസ്‌കാരം നൽകുന്നത്. കേരളപ്പിറവി ദിനത്തിൽ ആലുവ പി വി മാത്യു മെമ്മോറിയൽ എഫ്ബിഒഎ ഹാളിൽ നടന്ന ചടങ്ങിന്റെ ഉദ്ഘാടനവും പുരസ്‌കാര സമർപ്പണവും മുൻമന്ത്രി മോൻസ് ജോസഫ് എംഎൽഎ നിർവഹിച്ചു. ഡോ. എ പി ജെ അബ്‌ദുൾകലാം സ്റ്റഡിസെന്റർ ഡയറക്ടർ പൂവച്ചൽ സുധീർ അദ്ധ്യക്ഷത വഹിച്ചു. എറണാകുളം ജില്ലാ പഞ്ചായത്ത്‌ പ്രസിഡന്റ് മനോജ്‌ മൂത്തേടൻ. ആലുവ നഗരസഭ ചെയർമാൻ എം. ഒ ജോൺ, റ്റി. കെ മോഹനൻ, ബൈജു എഴുപുന്ന, സ്വാമി ധർമചൈതന്യ, ജനാബ് വി. എച്ഛ് അലിയാർ അൽഘാസിമി, അഡ്വ. തോമസ് പോൾ റമ്പാച്ചൻ തുടങ്ങിയവർ പങ്കെടുത്തു. വെള്ളപ്പൊക്കം , കോവിഡ് മഹാമാരിക്കെതിരായി നടത്തിയ പ്രതിരോധ പരിപാടിയിൽ  ജനങ്ങൾക്ക് ആവശ്യമായ ഭക്ഷ്യ വസ്തുക്കളും, വസ്ത്രങ്ങളും, മരുന്നുകളും എത്തിച്ച് നൽകൽ,

കേരളത്തിലെമ്പാടും ബ്ലഡ്‌ ഡൊണേഷൻ മേഖലയിൽ നടത്തിയ പ്രവർത്തനം, വൈക്കം കേന്ദ്രമായുള്ള വൃദ്ധസധനങ്ങളിലും പാലിയേറ്റീവ് കെയർ യൂണിറ്റുകളിലും ഭക്ഷണവും മരുന്നുകളും ഉൾപ്പടെ എത്തിക്കുന്നതിന് വേണ്ടി നടത്തിയ പ്രവർത്തനങ്ങൾ, തലയാഴം പഞ്ചായത്തിലെ സ്കൂളുകൾക്ക് എല്ലാവർഷവും നടത്തുന്ന പഠനോപകരണ വിതരണം, കൂടാതെ പുതിയ തലമുറയെ മദ്യത്തിൽ നിന്നും മയക്കുമരുന്നിൽ നിന്നും പിന്തിരിപ്പിച്ച് കായിക വിനോദങ്ങളിക്ക് അവരുടെ ശ്രദ്ധയെ ആകർഷിക്കാൻ നീന്തൽ പോലുള്ള കായിക വിനോദങ്ങളുടെ പരിശീലനപരിപാടികൾ സംഘടിപ്പിക്കൽ, അതിന്റെ ഫലമായി പത്തൊൻപതോളം വേൾഡ് വൈഡ് ബുക്ക്‌ ഓഫ് റെക്കോഡുകൾ നേടിക്കൊടുക്കാൻ നടത്തിയ പ്രവർത്തനങ്ങൾ, വയനാട് ദുരന്തത്തിലും അവിടെ പ്രവർത്തിച്ച സന്നദ്ധ സംഘടനകൾക്കും ജീവനക്കാർക്കും ആവശ്യസാധനങ്ങൾ എത്തിച്ചുകൊടുക്കുന്നതിന് വേണ്ടി നടത്തിയ പ്രവർത്തനം എന്നിവ കണക്കിലെടുത്താണ്

ഷിഹാബിനെ പുരസ്കാരത്തിനായി പരിഗണിച്ചത്. മാധ്യമപ്രവർത്തകൻ പി എം ഹുസൈൻ ജിഫ്രി തങ്ങൾ, പരിസ്ഥിതി പ്രവർത്തകൻ എം എൻ ഗിരി, എഴുത്തുകാരൻ കെ പി ഹരികുമാർ, എ. പി ജെ അബ്ദുൾ കലാം സ്റ്റഡിസെന്റർ പിആർഒ അനുജ എസ് എന്നിവരടങ്ങിയ ജൂറി കമ്മിറ്റിയാണ് പുരസ്കാര ജേതാക്കളെ തിരഞ്ഞെടുത്തത്.