Kaduthuruthy Mannar Karot Puthanpurakkal K.N. The cremation of Baiju (56)will take place tomorrow (June 15 ) at 12 noon at home.

തലയോലപ്പറമ്പ്: വെട്ടിക്കാട്ടുമുക്ക് പാലത്തില്‍ നിന്നും ആറ്റില്‍ ചാടി മരിച്ച സ്‌കൂട്ടര്‍ യാത്രികൻ്റെ സംസ്ക്കാരം നാളെ നടക്കും. കടുത്തുരുത്തി മാന്നാര്‍ പൂഴിക്കോല്‍ കരോട്ട് പുത്തന്‍പുരയ്ക്കല്‍ കെ.എന്‍. ബൈജു (56)ൻ്റെ സംസ്ക്കാരം നാളെ (ജൂൺ 15 ) ഞായറാഴ്ച ഉച്ചയ്ക്ക് 12ന് വീട്ടുവളപ്പിൽ നടക്കും. കാട്ടിക്കുന്ന് പാലാക്കരി ഫിഷ് ഫാമിന് സമീപം വേമ്പനാട്ട് കായലിന്റെ തീരത്ത് പൊങ്ങിയ നിലയില്‍ ശനിയാഴ്ച ഉച്ചയോടെയാണ് നാട്ടുകാര്‍ മൃതദേഹം കണ്ടെത്തിയത്. വെള്ളിയാഴ്ച പുലര്‍ച്ചെ തലയോലപ്പറമ്പ് വെട്ടിക്കാട്ടുമുക്ക് പാലത്തില്‍ നിന്നും ബൈജു സഞ്ചരിച്ചിരുന്ന സ്‌കൂട്ടറും ഉപയോഗിച്ചിരുന്ന ചെരുപ്പും കണ്ടെത്തിയതോടെയാണ് ആറ്റില്‍ ചാടിയതാകാമെന്ന സംശയം ഉയര്‍ന്നത്. തുടര്‍ന്ന് പോലീസും അഗ്‌നിരക്ഷാസേനയും വെള്ളിയാഴ്ച മൂവാറ്റുപുഴ ആറ്റില്‍ തിരച്ചില്‍ നടത്തിയെങ്കിലും യാതൊരു സൂചനയും ലഭിച്ചിരുന്നില്ല. ശനിയാഴ്ച രാവിലെ മുതല്‍ വീണ്ടും തിരച്ചില്‍ പുനരാരംഭിക്കുന്നതിനിടെയാണ് മൃതദേഹം കണ്ടെത്തിയത്. വൈക്കം പോലീസ് മേല്‍നടപടികള്‍ സ്വീകരിച്ചു. മൃതദേഹം വൈക്കം താലൂക്ക് ആശുപത്രി മോർച്ചറിയിൽ. റിയല്‍ എസ്റ്റേറ്റ് ബ്രോക്കറായ ബൈജു വീടും സ്ഥലവും വില്‍ക്കുന്ന കാര്യത്തെക്കുറിച്ച് സംസാരിക്കാന്‍ സുഹൃത്തിനെ കാണാനെന്ന് പറഞ്ഞ് വ്യാഴാഴ്ച വൈകീട്ട് വീട്ടില്‍ നിന്നും പോയി ഏറെ നേരം കഴിഞ്ഞിട്ടും കാണാതാവുകയും ഫോണില്‍ വിളിച്ചിട്ട് ലഭിക്കാതെ വന്നതോടെയും ബന്ധുക്കള്‍ കടുത്തുരുത്തി പോലീസില്‍ പരാതി നല്‍കിയിരുന്നു. പോലീസ് കേസ് രജിസ്റ്റര്‍ ചെയ്ത് അന്വേഷണം നടന്നുവരുന്നതിനിടെയാണ് മൃതദേഹം കണ്ടെത്തിയത്. ഭാര്യ - ദീപ, മക്കള്‍ - അനുപമ, ആനന്ദ്.