വൈക്കം മഹാദേവ ക്ഷേത്രത്തിലെ വടക്കു പുറത്തു പാട്ട്; തൈക്കാട്ട്ശ്ശേരി ഭഗവതി ക്ഷേത്രത്തിലേക്ക് നടന്ന ദേശതാലപ്പൊലി ഭക്തിസാന്ദ്രമായി.

വൈക്കം: വൈക്കം മഹാദേവ ക്ഷേത്രത്തിൽ 12 വർഷം കൂടുമ്പോൾ നടക്കുന്ന വടക്കു പുറത്തു പാട്ടിന് മുന്നോടിയായി തൈക്കാട്ട്ശ്ശേരി ഭഗവതി ക്ഷേത്രത്തിലേക്ക് നടന്ന ദേശതാലപ്പൊലി ഭക്തിസാന്ദ്രമായി. ഉദയനാപുരം സുബ്രഹ്മണ്യ ക്ഷേത്രത്തിൽ നിന്നും തൈക്കാട്ട്ശ്ശേരി പുന്നകീഴിൽ ഭഗവതി ക്ഷേത്രത്തിലേക്കാണ് ആദ്യ ദേശതാലപ്പൊലി നടന്നത്. വൈക്കത്തപ്പന്റെ പുത്രനായ ഉദയനാപുരത്തപ്പന്റെ സന്നിധാനത്തു നിന്നും ഉദയനാപുരത്തെ നാല് എൻ എസ്. എസ്. കരയോഗങ്ങളുടെ നേതൃത്വത്തിൽ നടത്തുന്ന ദേശതാലപ്പൊലി വടക്കുപുറത്തുപാട്ടിന്റെ വിളംബരമാണ്. പഴയ വടക്കുംകൂർ രാജ്യമായ വൈക്കം ദേശത്തിന്റെ ദേശദേവതകളായ തൈക്കാട്ട്ശ്ശേരി ക്ഷേത്രത്തിലും മൂത്തേടത്ത് കാവ് ഭഗവതി ക്ഷേത്രത്തിലും വൈക്കം ക്ഷേത്രത്തിൽ നടക്കുന്ന വടക്കു പുറത്ത് പാട്ട് വിവരം അറിയിക്കുന്ന ചടങ്ങാണ് ദേശതാലപ്പൊലി. ഉദയനാപുരം ക്ഷേത്രത്തിലെ ശ്രീ കോവിലിൽ നിന്നും കൊളുത്തിയ ദീപം ഉച്ചക്ക് 1.45 ന് തന്ത്രി കിഴക്കിനേടത്ത് മേക്കാട് മാധവൻ നമ്പൂതിരി കുത്തുവിളക്കിലേക്ക് പകർന്നു. മലയാറ്റൂർ കുടുബത്തിന്റെ പ്രതിനിധിയായ നികുഞ്ചത്തിൽ എം.സി. ഹരിക്കുട്ടൻ ഏറ്റുവാങ്ങി അവകാശികൾക്ക് കൈമാറി. ഉദയനാപുരം ക്ഷേത്രത്തിന് ഒരു പ്രദക്ഷിണം പൂർത്തിയാക്കി കിഴക്കേ ഗോപുരം വഴിയാണ് ദേശ താലപ്പൊലി തൈക്കാട്ട്ശ്ശേരി ക്ഷേത്രത്തിലേക്ക് പോയത്. വൈകിട്ട് 3.30 ന് കാൽ നടയായും ജംഗറിലും പുറപ്പെട്ട് ദീപാരധനക്ക് മുമ്പായി താലം തൈക്കാട്ടുശ്ശേരി ക്ഷേത്രത്തിൽ സമർപ്പിച്ചു. ദേശതാലപ്പൊലി നാളിൽ ഉച്ച പൂജക്ക് നടയടച്ചതിന് ശേഷം ഉച്ചയ്ക്ക് 1 ന് നട തുറന്ന് തന്ത്രിമാരുടെ കാർമ്മികത്വത്തിൽ ശ്രീകോവിലിൽ നിന്നും കൊണ്ടുന്ന ദീപം കുത്തുവിളക്കിലേക്ക് പകർന്നു. കർപ്പൂരരാധനക്ക് ശേഷം ഭക്തരുടെ കൂട്ട പ്രാർത്ഥനയോടെ മണ്ഡപത്തിൽ വച്ച് താലങ്ങൾ നിറച്ച് അലങ്കാരങ്ങളോടും വാദ്യമേളങ്ങളുടെ അകമ്പടിയോടെയാണ് ദേശതാലപ്പൊലി പുറപ്പെട്ടത്. വൈക്കം മഹാദേവ ക്ഷേത്രത്തിലെ വടക്കു പുറത്ത് പാട്ട് പുനരാംഭിച്ച ശേഷം ആറാമത് തവണ നടക്കുന്ന ദേശതാലപ്പൊലിക്ക് നൂറ് കണക്കിന് വനിതകൾ പങ്കെടുത്തു.

സൂരക്ഷ ക്രമീകരണങ്ങൾ ഒരുക്കിയാണ് ദേശതാലപ്പൊലി നടത്തിയത്. 

ചടങ്ങുകൾക്ക് എൻ എസ് എസ് വൈക്കം യൂണിയൻ പ്രസിഡൻ്റ് പി.ജി.എം. നായർ, സെക്രട്ടറി അഖിൽ ആർ നായർ, കൺവീനർമാരായ എ.സോമൻ, ആർ. വിജയ കുമാർ ,എം.സി. ഹരിക്കുട്ടൻ, എൻ. ശിവൻ , ജി.വി.കെ.നായർ തുടങ്ങിയവർ നേതൃ ത്വം നല്കി. ഏപ്രിൽ 1 ന് മൂത്തേടത്ത് കാവ് ഭഗവതി ക്ഷേത്രത്തിലേക്കും ദേശതാലപ്പൊലി നടക്കും. വൈക്കം ക്ഷേത്രത്തിൽ എപ്രിൽ 2 മുതൽ 13 വരെയാണ് വടക്കു പുറത്ത് പാട്ട് നടക്കുന്നത്.