ഗവൺമെന്റ് കോളേജ് മൊകേരിക്ക് NAAC വിലയിരുത്തലിൽ ശ്രദ്ധേയമായ നേട്ടം

മൊകേരി: ഗവൺമെന്റ് കോളേജ് മോകേരി, NAAC (നാഷണൽ അസസ്‌മെന്റ് ആൻഡ് അക്രഡിറ്റേഷൻ കൗൺസിൽ) വിലയിരുത്തലിൽ B+ ഗ്രേഡിൽ നിന്ന് B++ ഗ്രേഡിലേക്ക് ഉയർന്ന് ശ്രദ്ധേയമായ നേട്ടം കൈവരിച്ചു. കോളേജിന്റെ കുമുലേറ്റീവ് ഗ്രേഡ് പോയിന്റ് ആവറേജ് (CGPA) 2.6-ൽ നിന്ന് 2.9 ലേക്ക് ഉയർന്നിട്ടുണ്ട്. ഈ ഉയർന്ന NAAC ഗ്രേഡ്, അക്കാദമിക് മികവിലേക്കും വിദ്യാർത്ഥി അനുഭവങ്ങൾ മെച്ചപ്പെടുത്തുന്നതിലേക്കുമുള്ള ഗവൺമെന്റ് കോളേജ് മോകേരിയുടെ വലിയ ലക്ഷ്യങ്ങൾക്ക് തികച്ചും സഹായപ്രദമാണ്. കോളേജ് അതിന്റെ അടിസ്ഥാന സൗകര്യങ്ങൾ നവീകരിക്കുന്നതിൽ കാര്യമായ നിക്ഷേപം ഈ വർഷങ്ങളിൽ നടത്തിയിട്ടുണ്ട്. അത്യാധുനികമായ മൂന്ന് നിലകളുള്ള ലൈബ്രറി, ആധുനിക ഡിജിറ്റൽ റിസോഴ്സ് സെന്റർ, പ്രദേശത്തിന്റെ സമ്പന്നമായ ചരിത്രം പ്രദർശിപ്പിക്കുന്ന ഒരു ഹെറിറ്റേജ് മ്യൂസിയം, പ്രിൻസിപ്പൽ റൂം, ഓഫീസ്, ഓഡിറ്റോറിയം, സെമിനാർ ഹാൾ എന്നിവയുടെ നവീകരണം, പുതിയ സ്റ്റാഫ്‌ ക്വാർട്ടേഴ്‌സ്, കുറ്റ്യാടി നിയോജക മണ്ഡലം MLA, ശ്രീ കെ. പി. കുഞ്ഞമ്മദ് കുട്ടി യുടെ പ്രാദേശിക വികസന ഫണ്ട്‌ ഉപയോഗിച്ച് നിർമിച്ച ഗേറ്റ്, ഗ്രൗണ്ട് എന്നിവയെല്ലാം ഇതിൽ ഉൾപ്പെടുന്നു. കൂടാതെ, ഒരു മികച്ച ലാംഗ്വേജ് ലാബ്, പുതിയ കാലത്തിന്റെ ആവശ്യം അനുസരിച്ചുള്ള കോഴ്‌സുകൾ, നവീകരിച്ച കാന്റീൻ, മറ്റ് അടിസ്ഥാന സൗകര്യങ്ങൾ എന്നിവയെല്ലാം സമഗ്രവും ആധുനികവുമായ പഠന അന്തരീക്ഷം പ്രദാനം ചെയ്യാനുള്ള കോളേജിന്റെ പ്രതിബദ്ധത അടിവരയിടുന്നു.

ഈ മെച്ചപ്പെട്ട അക്രഡിറ്റേഷനിലേക്കുള്ള കോളേജിന്റെ യാത്രയിൽ പൂർവ്വ വിദ്യാർത്ഥി സംഘടന കാര്യമായ സംഭാവനകൾ നൽകിയിട്ടുണ്ട്. NAAC വിലയിരുത്തൽ പ്രക്രിയയിലേക്കുള്ള യാത്രയിൽ അവരുടെ ഭാഗത്തു നിന്നുള്ള അകമഴിഞ്ഞ പിന്തുണ മെച്ചപ്പെട്ട ഗ്രേഡ് നേടുന്നതിൽ നിർണ്ണായക ഘടകമായിരുന്നു. സാമ്പത്തിക സഹായങ്ങൾക്ക് പുറമെ, കാമ്പസിൽ ഏകീകൃത കുടിവെള്ള വിതരണ സംവിധാനം സ്ഥാപിക്കുന്നതിലും പൂർവ്വ വിദ്യാർത്ഥികൾ പ്രധാന പങ്ക് വഹിച്ചു. വിദ്യാർത്ഥികൾക്ക് ഏറെ പ്രയോജനകരമായ ഈ സംരംഭം നാക് ടീമിന്റെ പ്രത്യേക പ്രശംസ പിടിച്ചു പറ്റി.

കോളേജിന്റെ ഈ വിജയത്തിൽ പാരന്റ്-ടീച്ചർ അസോസിയേഷനും (PTA) ഒരു പ്രധാന പങ്ക് വഹിച്ചിട്ടുണ്ട്. കോളേജിന്റെ സംരംഭങ്ങൾക്കുള്ള അവരുടെ സജീവമായ പങ്കാളിത്തവും പിന്തുണയും ഈ അംഗീകാരം നേടുന്നതിൽ സഹായകമായിരുന്നു. പുതുതായി പെയിന്റ് ചെയ്ത സെമിനാർ ഹാൾ പി ടി എ യുടെ പരിശ്രമത്തിന്റെ പ്രകടമായ ഉദാഹരണമാണ്. കോളേജിന്റെ അടിസ്ഥാന സൗകര്യങ്ങൾ മെച്ചപ്പെടുത്തുന്നതിൽ അധികൃതരും നാട്ടുകാരും അകമഴിഞ്ഞ് സഹകരിച്ചിരുന്നു. കോളജിൽ  പെൺകുട്ടികൾക്കുള്ള ഹോസ്റ്റലിന്റെ നിർമാണ പ്രവൃത്തികൾ ത്വരിത ഗതിയിൽ നടന്നു വരുന്നു. 

ഒസ്മാനിയ സർവകലാശാലയുടെ മുൻ വൈസ് ചാൻസലർ ആയിരുന്ന ഡോ. രവീന്ദർ ദച്ചേപ്പള്ളി അധ്യക്ഷനായ നാക് കമ്മിറ്റി കോളജിൽ പുതുകാല കോഴ്‌സുകൾ, കൂടുതൽ ശാസ്ത്ര വിഷയങ്ങൾ, ലാബ് സൗകര്യങ്ങൾ, മുഴുവൻ ഡിപ്പാർട്മെന്റുകളിലും സ്ഥിരം അധ്യാപകർ, വിദ്യാർത്ഥികൾക്ക് താമസ സൗകര്യങ്ങൾ എന്നീ ക്രമീകരണങ്ങൾ കൂടെ അഭിലഷണീയമാണെന്ന് റിപ്പോർട്ടിൽ പരാമർശിച്ചു. 

നവീകരിച്ച അടിസ്ഥാന സൗകര്യങ്ങളോടും ശക്തമായ പിന്തുണാ സംവിധാനങ്ങളോടും കൂടി, ഗവൺമെന്റ് കോളേജ് മോകേരി പുതിയ ഉയരങ്ങളിലേക്ക് കുതിക്കാനും ഗുണമേന്മയുള്ള വിദ്യാഭ്യാസം നൽകാനും ഭാവി തലമുറകളെ പരിപോഷിപ്പിക്കാനും ഒരുങ്ങുകയാണെന്ന് പ്രിൻസിപ്പൽ ശ്രീ. അഷ്‌റഫ്‌. കെ. കെ അറിയിച്ചു.