ഗജരാജൻ പല്ലാട്ട് ബ്രഹ്‌മദത്തൻ ഇടിമിന്നലേറ്റ് ചെരിഞ്ഞു.

Gajarajan Pallattu Brahmadattan leaned against the thunderbolt.

കോട്ടയം : മദ്ധ്യതിരുവിതാംകൂറിലെ 200 ൽ അധികം പ്രമുഖ ക്ഷേത്രങ്ങളിലെ ഉത്സവങ്ങളിൽ നിറസാന്നിധ്യമായിരുന്ന ഗജരാജൻ പല്ലാട്ട് ബ്രഹ്‌മ ദത്തൻ ഇടിമിന്നലേറ്റ് ചെരിഞ്ഞു. ഞായറാഴ്ച വൈകിട്ട് മഴയോടൊപ്പമുണ്ടായ മിന്നലിലാണ് ബ്രഹ്മദത്തന് ഗുരുതര പരിക്കേറ്റത്. മേലമ്പാറയിൽ അഡ്വ. രാജേഷ് പല്ലാട്ടിൻ്റെ ഉടമസ്ഥതയിലുള്ള ആനയെ വീട്ടുപരിസരത്ത് തന്നെയാണ് തളച്ചിരുന്നത്. മൃഗഡോക്ടറെത്തി മരണം സ്ഥീരികരിച്ചു. അരുണാചൽ വനങ്ങളിൽ തപ്പാന ആയിരുന്ന ഇവനെ കേരളത്തിലേക്ക് കൊണ്ടുവരുന്നത് കോട്ടയം പുതുപള്ളി പോത്തൻ വർഗീസ് അച്ചായനാണ്. 25 വർഷമായി കേരളത്തിലുള്ള ബ്രഹ്മദത്തന് ഏകദേശം 50 വയസ്സിൽ അധികം പ്രായവും 298 സെന്റിമീറ്ററിൽ അധികം ഉയരവുമുണ്ട്. കോട്ടയം തിരുവാർപ്പ് ശ്രീകൃഷ്ണസ്വാമി ക്ഷേത്രത്തിലെ ഉത്സവത്തോടനുബന്ധിച്ച് ആനവാൽ പിടി ചടങ്ങിന് വർഷങ്ങളായി എഴുന്നള്ളിക്കുന്നത് ബ്രഹ്മദത്തനെയാണ്. തൃശൂർ പൂരം, വൈക്കത്തഷ്ടമി, ഏറ്റുമാനൂർ ക്ഷേത്രം ഉത്സവം, ഉദയനാപുരം തൃക്കാർത്തിക, ഉദയനാപുരത്തപ്പൻ്റെ വിടവാങ്ങൽ ചടങ്ങ് അടക്കവും, തിരുനക്കര, ശക്തികുളങ്ങര, മഹാക്ഷേത്രങ്ങളിൽ പ്രധാന തിടമ്പ് എഴുന്നള്ളിപ്പ് ബ്രഹ്മദത്തനാണ്. കേരളത്തിലെ ആനപ്രേമികളുടെ പ്രിയങ്കരനായിരുന്നു പല്ലാട്ട് ബ്രഹ്മദത്തൻ. ഉത്സവങ്ങളിലും പൊതുപരിപാടികളിലും നിറസാന്നിധ്യമായിരുന്നു. ബ്രഹ്മദത്തൻ്റെ ആകസ്മിക വേർപാട് ആനപ്രേമികൾ അടക്കം ഏവരെയും ദു:ഖത്തിലാഴ്ത്തി.