Student's death in Thamarassery: 5 students charged with murder, shifted to observation home, given opportunity to appear for public exams

കോഴിക്കോട് : താമരശ്ശേരിയിലെ വിദ്യാര്‍ത്ഥി സംഘര്‍ഷത്തില്‍ പരുക്കേറ്റ ചികിത്സയിലായിരുന്ന പത്താം ക്ലാസ് വിദ്യാര്‍ത്ഥി മരിച്ചു. താമരശ്ശേരി ചുങ്കം സ്വദേശി മുഹമ്മദ് ഷഹബാസ് ആണ് മരിച്ചത്. സ്വകാര്യ ട്യൂഷന്‍ സെന്ററില്‍ നടന്ന ഫെയര്‍വെല്‍ പരിപാടിയെ ചൊല്ലിയാണ് സംഘര്‍ഷം ഉണ്ടായത്. കുടുംബത്തിന്റെ ദുഃഖത്തില്‍ പങ്കുചേരുന്നതായി പൊതുവിദ്യാഭ്യാസ മന്ത്രി വി ശിവന്‍കുട്ടി പറഞ്ഞു

പുലര്‍ച്ചെ പന്ത്രണ്ടരയോടെയാണ് മരണം സ്ഥിരീകരിച്ചത്. തലക്കേറ്റ ഗുരുതരമായ ആഘാതമാണ് മരണകാരണമെന്നാണ് പ്രാഥമിക നിഗമനം. സ്വകാര്യ ട്യൂഷന്‍ സെന്ററിലെ ഫെയര്‍വെല്ലിനോടനുബന്ധിച്ച് നടന്ന പരിപാടിയെ തുടര്‍ന്നുണ്ടായ തര്‍ക്കമാണ് സംഘര്‍ഷത്തില്‍ കലാശിച്ചത്. നഞ്ജക്ക് ഉപയോഗിച്ചാണ് ഷഹബാസിനെ ആക്രമിച്ചത്.

സംഘര്‍ഷത്തില്‍ ഗുരുതരമായി പരുക്കേറ്റ ഷഹബാസിനെ കൂടുതല്‍ വിദഗ്ധ ചികിത്സക്കായി കോഴിക്കോട് മെഡിക്കല്‍ കോളേജില്‍ പ്രവേശിപ്പിക്കുകയായിരുന്നു. സ്വകാര്യ ട്യൂഷന്‍ സെന്ററില്‍ സര്‍ക്കാര്‍ അധ്യാപകര്‍ പഠിപ്പിച്ചിട്ടുണ്ടോ എന്ന കാര്യം പരിശോധിക്കുമെന്ന് പൊതു വിദ്യാഭ്യാസ ഉപഡയറക്ടര്‍ സി മനോജ് കുമാര്‍ പറഞ്ഞു

സംഭവത്തില്‍ കൊലക്കുറ്റം ചുമത്തി താമരശേരി പൊലീസ് കേസെടുത്തു. സംഭവമായി ബന്ധപ്പെട്ട് അഞ്ച് വിദ്യാര്‍ത്ഥികളെ ജ്യൂവനല്‍ ജസ്റ്റിസിന് മുന്നില്‍ ഹാജരാക്കി. അഞ്ചു പേരെയും വെള്ളിമാടുകുന്നിലെ ഒബ്‌സര്‍വേഷന്‍ ഹോമിലേക്ക് മാറ്റി. ഇവര്‍ക്ക് പൊതുപരീക്ഷ എഴുതാന്‍ അവസരം ഒരുക്കും

Tags:

enlightmedia,malayalamnews,kerala,latestnews